Ina Bello, drejtoreshë e Drejtorisë Rajonale të Tatimeve në Durrës, është shkarkuar nga detyra. Sipas informacionit të dhënë, vendimi lidhet me performancë të dobët në drejtimin e institucionit dhe me mosrealizimin e objektivave të vendosura nga administrata qendrore tatimore.

Drejtoria Rajonale e Tatimeve në Durrës konsiderohet një ndër strukturat më të rëndësishme në vend, për shkak të volumit të lartë të aktivitetit ekonomik dhe peshës që ka në mbledhjen e të ardhurave buxhetore. Për këtë arsye, çdo problem në drejtimin e saj reflektohet drejtpërdrejt në rezultatet financiare dhe në funksionimin e administratës tatimore në terren.

Sipas burimeve, gjatë periudhës së drejtimit të Ina Bellos janë konstatuar mangësi në arritjen e treguesve të performancës, në menaxhimin e burimeve njerëzore dhe në eficiencën e kontrolleve tatimore. Këto elemente kanë çuar në vlerësimin se drejtoria nuk ka funksionuar në nivelin e pritshëm.

Largimi vjen në një kohë kur administrata tatimore është nën presion për të rritur të ardhurat, për të luftuar informalitetin dhe për të garantuar trajtim të barabartë për biznesin. Në këtë kontekst, ndryshimet në drejtimin e strukturave rajonale shihen si pjesë e një procesi më të gjerë riorganizimi dhe rritjeje të kontrollit mbi performancën e drejtuesve.

Po sipas burimeve, Ina Bello është emëruar në këtë detyrë pas një karriere si inspektore e Tatimeve në Tiranë, ndërsa pretendohet se përfshirja e saj në veprime të kontestuara ndaj bizneseve dhe keqpërdorimi i funksionit kanë qenë pjesë e arsyeve që e kanë shoqëruar atë në këtë pozicion. Të njëjtat burime pretendojnë se këto elemente nuk kanë qenë të mjaftueshme për t’i garantuar jetëgjatësi në detyrë.