Mosmarrëveshja mes banorëve të fshatit Gjorm dhe punonjësve të shëndetësisë ka marrë sot një përshkallëzim të ndjeshëm, duke kaluar nga ankesa të përsëritura në një konflikt të hapur institucional.

Në qendër të situatës është një peticion i organizuar nga kryeplaku i fshatit, Andrea Matani, në emër të komunitetit, ku ngrihen akuza të rënda ndaj dy infermiereve që shërbejnë në qendrën shëndetësore të Gjormit.

“Na ka marrë frika të kërkojmë shërbim mjekësor”

Sipas ankesave të banorëve, dy infermieret, të cilat prej një kohe të gjatë janë caktuar të shërbejnë në këtë fshat, nuk e ushtrojnë më funksionin e tyre si punonjëse shëndetësore, por sillen “si banore të fshatit”, duke mos respektuar detyrën dhe orarin e shërbimit.

Banorët pretendojnë se janë kërcënuar verbalisht dhe se situata ka shkuar deri aty sa shumë prej tyre kanë frikë të paraqiten për shërbim mjekësor në ambulancë.

“Ne jemi shumë të lodhur dhe të mërzitur. Nuk i duam më këtu. Nëse nuk merren masa, do të ankohemi në Ministrinë e Shëndetësisë në Tiranë”, thuhet në mesazhet e përcjella nga banorët përfaqësuesve të tyre.

Akuza për mungesë reagimi institucional

Kryeplaku i fshatit, Andrea Matani, shprehet se fillimisht është përpjekur ta zgjidhë situatën në rrugë institucionale, duke kontaktuar drejtoreshën e qendrës shëndetësore, doktoreshë Aferdita Meta. Sipas tij, kjo e fundit jo vetëm që nuk ka ndërmarrë asnjë veprim, por e ka bllokuar në telefon, duke refuzuar komunikimin.

Më pas, Matani thotë se ka komunikuar me Drejtorin e Shëndetësisë, Myzafer, i cili fillimisht ka dhënë premtime se do ta zgjidhte problemin, por më pas nuk ka reaguar më dhe ka ndërprerë komunikimin.

“Kuptova se gjithçka ishte një sqarim fallco. Përfundimisht, nuk u zgjidh asgjë dhe drejtori i doli në mbrojtje doktoreshës”, shprehet kryeplaku.

Incident dhe tone kërcënuese

Situata është tensionuar më tej ditën e sotme, kur sipas kryeplakut, një person me automjet tip fuoristradë është paraqitur pranë ambulancës dhe ka reaguar me tone kërcënuese, pasi ishte njoftuar se kryeplaku kishte lajmëruar sallën dhe po kërkonte ndërhyrje institucionale.

Për shkak të konfliktit, në zonë ka mbërritur edhe inspektori i zonës, Ruzhdi Celaj, për të menaxhuar situatën, ndërsa kryeplaku ka deklaruar se ka dhënë një deklaratë zyrtare lidhur me ngjarjen.

Banorët: “Nuk kemi më nevojë për shërbimin tuaj”

Në mesazhet e përcjella nga banorët shprehet qartë se komuniteti ndihet i braktisur dhe i poshtëruar.

“Nuk kemi më nevojë për shërbimin tuaj mjekësor. Do të kujdesemi vetë”, thuhet në një prej reagimeve më të forta, që pasqyron nivelin e lartë të revoltës në fshat.

Ambulanca e rikonstruktuar nga banorët

Një tjetër element që rëndon situatën është fakti se qendra shëndetësore e Gjormit është rikonstruktuar me kontributin e banorëve, konkretisht nga Adhurim Shenaj, rezident në Mbretërinë e Bashkuar, çka ka shtuar ndjesinë e padrejtësisë tek komuniteti, i cili ndjen se investimi i tyre po shpërfillet.

Peticion dhe paralajmërim për hapa të tjerë

Peticion i organizuar nga kryeplaku Andrea Matani pritet t’u dërgohet institucioneve përgjegjëse, ndërsa banorët paralajmërojnë se nëse nuk ka reagim, çështja do të çohet në nivele më të larta, përfshirë Ministrinë e Shëndetësisë dhe media kombëtare.

Situata në Gjorm mbetet e tensionuar, ndërsa komuniteti kërkon ndërhyrje urgjente, sqarim të plotë dhe garantim të një shërbimi shëndetësor dinjitoz për banorët e zonës.