Gjatë një seance plenare të Dhomës së Përfaqësuesve, ku u rizgjodh si kryeministër, presidenti i Partisë Liberal Demokratike, Shigeru Ishiba, dyshohet se e zuri gjumi.
Në disa fotografi të postuara në rrjetet sociale, Ishiba shfaqet duke parë poshtë dhe mbyllur sytë për pak çaste teksa priste numërimin e votave. Përdoruesit online reaguan me komente të ndryshme, disa duke u habitur: “Nuk mund ta besoj që ai po fle në këtë mënyrë!”
Një ligjvënës veteran i Partisë Demokratike Kushtetuese të Japonisë e kritikoi hapur Ishiban, duke u shprehur se, nëse ishte vërtet në gjumë, kjo tregonte mungesë serioze të tensionit dhe angazhimit të tij. Ishiba fitoi kundrejt Yoshihiko Noda, kreut të opozitës së Partisë Demokratike Kushtetuese të Japonisë, në një balotazh, sipas mediave vendase.
Ishiba shfaqej duke i mbyllur sytë gjatë votimit të parë, ndërkohë që ligjvënësit e tjerë po thirreshin një e nga një për votim. Në atë moment, kryesekretari i kabinetit, Yoshimasa Hayashi, i cili ishte ulur pranë tij, duket se e shikonte me shqetësim.
Zëdhënësi i qeverisë, në një konferencë për shtyp të hënën vonë, kur u pyet për shëndetin e kryeministrit, shpjegoi se Ishiba ka qenë tepër i zënë duke punuar deri në orët e vona të natës. Ai shtoi se kryeministri ishte i ftohur atë ditë dhe po merrte ilaçe për t’u ndjerë më mirë.
