Forcat izraelite paralajmërojnë evakuimin në gjuhën perse, synojnë objektiva ushtarake në zonën ku banojnë mbi 1 milionë qytetarë iranianë
Tensionet në Lindjen e Mesme kanë hyrë në një fazë të re alarmante, pasi ushtria izraelite (IDF) ka paralajmëruar një sulm ajror të drejtpërdrejtë në Distriktin 3 të Teheranit, një zonë me mbi 1 milion banorë. Njoftimi është shpërndarë në gjuhën perse, duke kërkuar evakuimin urgjent të popullsisë civile.
Sipas mediave iraniane, ky paralajmërim përbën herën e parë që Izraeli bën thirrje për evakuim në mënyrë të drejtpërdrejtë që nga fillimi i përshkallëzimit ushtarak, të premten e kaluar. Distrikti 3 ndodhet në verilindje të kryeqytetit iranian dhe përfshin zona të dendura të banuara me civilë dhe institucione.
Zëdhënësi izraelit Kamal Pinhasi, përmes portalit Ynet, deklaroi se “IDF do të veprojë në orët në vijim në këtë zonë për të neutralizuar infrastrukturën ushtarake të regjimit iranian”. Sipas tij, praninë e civilëve në këtë territor e konsiderojnë si rrezik të drejtpërdrejtë për jetën e tyre.
“Për sigurinë tuaj, ju lutemi të largoheni menjëherë nga zona e shënuar në hartë në Distriktin 3,” theksoi Pinhasi, duke lënë të kuptohet se sulmet do të jenë intensive dhe të koordinuara.
Ndërkohë, Izraeli kreu një seri sulmesh ajrore më herët gjatë ditës në pjesën perëndimore të Teheranit, duke përdorur avionë bombardues me rreze të gjatë veprimi. Këto operacione konsiderohen si pjesë e një fushate më të gjerë për të dëmtuar kapacitetet ushtarake të Iranit.
Irani, nga ana e tij, ka deklaruar se do të përgjigjet me masa të ngjashme. Autoritetet ushtarake iraniane kanë paralajmëruar goditje të mundshme në territorin izraelit, duke rritur rrezikun për përshkallëzim të konfliktit rajonal.
Situata mbetet e tensionuar, ndërsa komuniteti ndërkombëtar ndjek me shqetësim zhvillimet në kryeqytetin iranian, ku jetët e miliona civilëve janë në rrezik të drejtpërdrejtë.
