Nga: Ndriçim Gjoshi
I moshuari u gjet pa shenja jete në një zgavër rreth 20 metra të thellë, pas denoncimit të familjarëve për zhdukjen e tij
Një ngjarje tragjike ka tronditur fshatin Balldre në Lezhë, ku një 73-vjeçar ka humbur jetën pasi ra në një shpellë të thellë rreth 20 metra. Viktima, i identifikuar me inicialet P.M., ishte larguar nga banesa pa lënë ndonjë shenjë dhe u shpall i humbur nga familjarët e tij.
Pas disa orësh kërkimi, trupi i pajetë i të moshuarit u gjet brenda një zgavre natyrore, ndërsa forcat zjarrfikëse dhe policia ndërhynë për të bërë të mundur nxjerrjen e trupit nga thellësia e shpelles.
Familjarët kishin denoncuar zhdukjen e tij në komisariatin e policisë, çka çoi në mobilizimin e autoriteteve lokale për nisjen e kërkimeve në zonë. Fatkeqësisht, kërkimi përfundoi me lajmin e dhimbshëm për humbjen e jetës së 73-vjeçarit.
Ende nuk janë bërë të ditura shkaqet që çuan në rënien e tij në këtë shpellë, ndërsa dyshohet për një aksident tragjik që mund të ketë ndodhur gjatë lëvizjes së tij në terren të vështirë.
Grupi hetimor ndodhet në vendin e ngjarjes dhe po mbledh prova për të kuptuar rrethanat e plota të aksidentit fatal. Ekspertët pritet të përcaktojnë nëse bëhet fjalë për rrëshqitje aksidentale apo ndonjë tjetër rrethanë që mund të ketë ndikuar në këtë tragjedi.
Ngjarja ka sjellë trishtim të thellë në komunitetin lokal, ku i ndjeri ishte një banor i njohur dhe i respektuar. Banorët e zonës shprehën ngushëllime për familjen dhe ndihen të tronditur nga lajmi i rëndë.
