Kanë dalë detaje të reja lidhur me operacionin e zhvilluar pak ditë më parë nga SPAK në qytetin e Vlorës, ku u arrestuan disa persona të dyshuar si pjesë e grupit kriminal të Inez Hajrullës, një emër i njohur në botën e krimit të organizuar.

Sipas informacioneve të publikuara në media, aksioni konsiderohet një zhvillim i rëndësishëm për hetimet në këtë qytet, pasi është ndër rastet e para kur SPAK hap një dosje që lidhet drejtpërdrejt me aktivitetet kriminale në Vlorë. Deri më tani, hetimet e këtij institucioni kanë qenë të përqendruara kryesisht në qytete të tjera si Elbasani, Durrësi dhe Lezha.

Raportohet gjithashtu se gjatë operacionit autoritetet kanë hyrë për herë të parë në zonën e banesave të Hajrullës, të njohur si “Blloku Oslo”, një zonë që, sipas burimeve, ruhej me masa të forta sigurie.

Po sipas këtyre burimeve, Inez Hajrulla konsiderohet një nga personat më të ruajtur në vend, duke lëvizur shpesh me autokolonë makinash të blinduara dhe me masa të shumta sigurie.

Në rrugët e Vlorës prej kohësh kanë qarkulluar dyshime për përfshirjen e grupit të tij në disa ngjarje të rënda kriminale, megjithatë deri më tani shumë prej tyre nuk kishin çuar në masa konkrete sigurie.

Informacione të tjera në media bëjnë me dije se Hajrulla dhe njerëzit e tij banonin në katet e fundit të “Bllokut Oslo”, ku dyert e apartamenteve ishin të blinduara dhe të pajisura me gjemba metalikë. Dyshohet se disa ngjarje të rënda kriminale mund të jenë planifikuar ose kryer brenda këtyre banesave.

Vlora prej vitesh përmendet si një nga zonat më të prekura nga krimi i organizuar, ndërsa aktiviteti kryesor që lidhet me këto grupe dyshohet të jetë trafiku i lëndëve narkotike.

Hetimet e fundit të SPAK pritet të hedhin më shumë dritë mbi rolin dhe aktivitetin e këtij grupi në qytetin bregdetar.

Sipas informacioneve në media, Inez Hajrulla mori drejtimin e grupit kriminal të qytetit pas ekzekutimit të Edison Harizajt, i njohur në botën e nëndheshme si “Edison Faqedjeguri”, në nëntor të vitit 2018, kur ishte vetëm 26 vjeç.