Ministria e Bujqësisë dhe Universiteti Bujqësor i Tiranës forcojnë bashkëpunimin për më shumë mundësi për studentët dhe një lidhje më të ngushtë mes dijes dhe praktikës.

Ministri i Bujqësisë, Andis Salla, nënshkroi marrëveshjen e bashkëpunimit me Universitetin Bujqësor të Tiranës, një marrëveshje që synon të krijojë më shumë mundësi për studentët dhe të afrojë më tej universitetin me sektorin e bujqësisë.

“Për më shumë mundësi për studentët, më shumë lidhje mes dijes dhe praktikës dhe një bashkëpunim më të fortë në funksion të zhvillimit të bujqësisë shqiptare. Ju uroj një ditë të mbarë!”

Marrëveshja u prit nga drejtuesit e Universitetit Bujqësor si një hap i rëndësishëm për forcimin e bashkëpunimit mes institucioneve.

Universiteti Bujqësor i Tiranës mbetet një nga institucionet kryesore në përgatitjen e specialistëve të fushës, të cilët çdo vit i bashkohen tregut të punës në sektorin e bujqësisë dhe zhvillimit rural.

Pikërisht lidhja e studentëve me praktikën dhe nevojat reale të sektorit shihet si një nga pikat kryesore të këtij bashkëpunimi.

Që nga auditorët dhe laboratorët e universitetit, deri te puna në terren, synimi është që njohuritë e fituara nga studentët të jenë sa më pranë kërkesave të tregut dhe nevojave të fermerëve.

Një bashkëpunim që synon të afrojë më shumë studentët, specialistët, institucionet dhe fermerët, duke i dhënë një rol më të drejtpërdrejtë dijes dhe profesionistëve të rinj në zhvillimin e bujqësisë shqiptare.