LOS ANGELES – Billy Crystal, Paris Hilton dhe shumë yje të tjerë të Hollivudit janë mes atyre që kanë humbur shtëpitë e tyre në zjarret vdekjeprurëse që po shkatërrojnë zonën e Los Angeles-it.
Me mbi 1,000 ndërtesa të shkatërruara, zjarret kanë prekur edhe lagjet luksoze të mbushura me vila të personaliteteve të famshme.
Një nga zonat më të goditura është Pacific Palisades, një parajsë malore pranë maleve Santa Monica dhe plazheve të Oqeanit Paqësor. Flakët, të shtyra nga erërat e furishme, janë përhapur me një shpejtësi marramendëse, duke shndërruar një pjesë të madhe të kësaj zone panoramike në hi.
Aktori James Woods, i njohur për rolet në filma si “Nixon” dhe “Casino,” tregoi me lot në sy për CNN humbjen e shtëpisë së tij në Pacific Palisades. “Një ditë po notonim në pishinë dhe ditën tjetër gjithçka ishte zhdukur,” tha ai, duke kujtuar momentin prekës kur mbesa tetëvjeçare e gruas së tij i ofroi kursimet nga arka e saj për të ndihmuar në rindërtimin e shtëpisë.
Billy Crystal, i njohur për filmin “When Harry Met Sally,” dhe gruaja e tij, Janice, gjithashtu humbën shtëpinë e tyre në Pacific Palisades, ku kishin jetuar që nga viti 1979. “Çdo cep i shtëpisë sonë ishte plot me dashuri dhe kujtime të bukura,” tha Crystal në një deklaratë. “Jemi të pikëlluar, por me dashurinë e fëmijëve dhe miqve tanë, do t’ia dalim.”
Paris Hilton, trashëgimtarja e hoteleve Hilton, konfirmoi se shtëpia e saj në Malibu ishte shkatërruar. Në një postim në Instagram, ajo tha: “Të shohësh shtëpinë tënde duke u djegur drejtpërdrejt në televizor është një eksperiencë që askush nuk duhet ta përjetojë.”
Një tjetër viktimë e zjarreve është Miles Teller, aktori i filmit “Top Gun: Maverick.” Gruaja e tij, Keleigh Sperry, ndau një foto të flakëve në Instagram, duke iu lutur njerëzve të lënë ujë për kafshët që janë braktisur gjatë evakuimeve.
Ndërkohë, aktori Mark Hamill, i njohur për rolin e tij në “Star Wars,” e quajti zjarrin “më të tmerrshmin që nga viti 1993,” kur mbi 18,000 hektarë u dogjën në Malibu. Hamill evakuoi shtëpinë e tij në minutën e fundit, duke kaluar në rrugë të rrethuara nga flakët.
Zjarret kanë prekur jo vetëm shtëpitë, por edhe monumente historike dhe aktivitete të rëndësishme kulturore. Palisades Charter High School, e cila shërbeu si set për filmin horror të vitit 1976 “Carrie,” është shkatërruar. Po ashtu, disa premiera filmash dhe ngjarje prestigjioze, si Çmimet SAG dhe aktivitetet për nominimet e Oscar-it, janë anuluar.
Në një akt heroik, aktori Steve Guttenberg nga “Police Academy” ndihmoi zjarrfikësit duke lëvizur makinat e braktisura për të hapur rrugët. Ai u bëri thirrje banorëve të zonës të lënë çelësat në makinat e tyre për t’i bërë të lëvizshme.
Një zjarr tjetër shpërtheu të mërkurën në mbrëmje në kodrat e Hollywood-it, pranë simbolit të famshëm “Hollywood.” Autoritetet po përpiqen të frenojnë përhapjen e flakëve, ndërsa mijëra banorë mbeten në pasiguri dhe pikëllim.
Ndërkohë, yjet dhe banorët e prekur kanë nisur të ndajnë historitë e tyre, duke treguar për dhimbjen, solidaritetin dhe fuqinë për të rifilluar nga e para.
