Inspektori i Lartë i Drejtësisë, Artur Metani, zhvilloi një vizitë pune në Londër, ku u takua me autoritete të rëndësishme të drejtësisë britanike dhe në Ministrinë e Jashtme të Mbretërisë së Bashkuar. Shoqëruar nga një delegacion i Inspektoratit të Lartë të Drejtësisë (ILD) dhe ambasadori shqiptar në Britaninë e Madhe, Uran Ferizi, Metani kërkoi të forconte bashkëpunimin dhe shkëmbimin e praktikave të mira për përmirësimin e efikasitetit të sistemit të drejtësisë.
Gjatë qëndrimit në Inspektoratin e Shërbimit të Prokurorisë së Kurorës së Madhërisë së Tij, Metani u mikprit nga Kryeinspektori Anthony Rogers. Ata diskutuan mbi rolin e inspektimeve në forcimin e transparencës dhe paanësisë në sistemin e drejtësisë, me qëllim promovimin e besimit të publikut. Metani dhe ekipi i tij theksuan rëndësinë e inspektimeve për një drejtësi më të efektshme dhe të besueshme.
Një tjetër aktivitet i rëndësishëm ishte takimi i zhvilluar me Zëvendës Kryeinspektoren Lisa Morris dhe ekspertë të tjerë të Inspektoratit britanik të Prokurorisë. Ata prezantuan procesin e inspektimeve, inspektimet tematike dhe ato pasuese. Njëkohësisht, u diskutua për rekomandimet dhe ndikimin që kanë inspektimet në cilësinë e shërbimit të drejtësisë, dhe se si këto mund të krahasohen me modelin shqiptar.
Në takimin me ekipin e Zyrës së Hetimeve të Sjelljes Gjyqësore, Metani dhe delegacioni i tij u njohën me hetimet ndaj gjyqtarëve në Mbretërinë e Bashkuar dhe procesin disiplinor të aplikueshëm për ta. U diskutua mbi ngjashmëritë dhe dallimet në hetimet disiplinore, si dhe masat ndëshkuese ndaj gjyqtarëve. Këto takime ndihmuan në forcimin e bashkëpunimit mes institucioneve të drejtësisë të dy shteteve.
Një tjetër moment i rëndësishëm ishte takimi me drejtoren për Ballkanin Perëndimor, Madeline Knox, në Ministrinë e Jashtme britanike. Metani i bëri një prezantim të funksionit të ILD-së dhe vlerësoi mbështetjen e vazhdueshme të Mbretërisë së Bashkuar për Shqipërinë, sidomos në procesin e integrimit evropian dhe forcimin e shtetit të së drejtës.
Në fund të vizitës, Metani dhe delegacioni i tij u mikpritën në Ambasadën e Shqipërisë në Londër, nga ambasadori Uran Ferizi. Metani falënderoi ambasadorin për mbështetjen dhe diskutoi rreth kontributit të Ambasadës në mbrojtjen e interesave të Shqipërisë dhe shqiptarëve në Britani, si dhe për zhvillimin e marrëdhënieve dypalëshe.
