Një sulm me armë zjarri është regjistruar në orët e vona të së enjtes ndaj konsullatës së Irakut në Stamboll, duke rritur shqetësimet për sigurinë diplomatike në qytetin më të madh turk. Dy persona, ende të paidentifikuar dhe që lëviznin me një motoçikletë, qëlluan tetë herë në drejtim të ndërtesës diplomatike.
Fatmirësisht, sulmi nuk shkaktoi viktima njerëzore apo dëme materiale. Autoritetet turke reaguan menjëherë pas incidentit, duke konfirmuar ngjarjen dhe nisjen e menjëhershme të hetimeve për të zbuluar identitetin dhe motivet e agresorëve.
Zëdhënësi i Ministrisë së Jashtme turke, Ondzu Ketseli, tha për mediat se autorët hapën zjarr duke marrë në shënjestër fasadën e konsullatës irakiane, ndërsa sqaroi se nuk ka persona të lënduar apo dëmtime të tjera. Ai premtoi se autoritetet do të bëjnë gjithçka për t’i sjellë sa më shpejt përgjegjësit para drejtësisë.
Ngjarja është regjistruar në një zonë diplomatike mjaft të frekuentuar në Stamboll, duke nxitur kështu edhe shqetësime për sigurinë e përfaqësive të huaja në këtë qytet që ka përjetuar incidente të ngjashme edhe në të kaluarën.
Ende nuk ka një reagim zyrtar nga pala irakiane lidhur me sulmin, por pritet që në orët në vijim Bagdadi të kërkojë sqarime dhe garanci për mbrojtjen e selisë së tij diplomatike në Turqi.
Ndërkohë, shërbimet e sigurisë në Stamboll kanë intensifikuar patrullimet dhe kanë ngritur pika kontrolli për të parandaluar sulme të tjera dhe për të identifikuar sulmuesit. Po ashtu, kamerat e sigurisë janë vënë në dispozicion të hetuesve për të shpejtuar procesin e zbardhjes së kësaj ngjarjeje.
Incidenti i fundit vjen në një moment kur marrëdhëniet midis Irakut dhe Turqisë kanë kaluar periudha të ndryshme tensionesh, por autoritetet turke sigurojnë se ky sulm nuk do të ndikojë në bashkëpunimin e mirë dhe në marrëdhëniet diplomatike midis dy vendeve.
