Policia e Korçës ka nisur një operacion masiv kundër aktivitetit të lojërave të fatit, duke shoqëruar në komisariat disa persona gjatë mbrëmjes së sotme. Operacioni po zhvillohet në lokalet më problematike të qytetit juglindor, të cilat dyshohet se vazhdonin të pranonin baste sportive në mënyrë të paligjshme.
Aksioni, që filloi rreth një orë më parë, është ende në vijim dhe po zhvillohet nga forcat “Shqiponja” në bashkëpunim me patrullat e komisariatit lokal. Në shënjestër janë vendosur disa ambiente të njohura në qytet, për të cilat kishte informacion paraprak se ushtronin aktivitetin ilegal të basteve sportive.
Gjatë kontrolleve të imtësishme janë sekuestruar aparatura elektronike dhe dokumentacione, që do të shërbejnë si prova për hetimet e mëtejshme. Aktualisht, numri i personave të shoqëruar është i lartë dhe ata janë duke u marrë në pyetje nga oficerët e policisë.
Ende nuk ka informacione zyrtare nëse mes të shoqëruarve ka persona që do të arrestohen apo do të procedohen penalisht, por burime nga policia thanë se disa prej tyre mund të përballen me akuza të rënda, për organizim të lojërave të fatit në mënyrë të kundraligjshme.
Ky aksion vjen në vijim të fushatës së intensifikuar të autoriteteve shqiptare për të goditur fenomenin e lojërave të fatit, që është bërë shqetësim madhor për sigurinë publike dhe ekonominë familjare në vend. Edhe më herët, në qytetin e Korçës janë ndërmarrë kontrolle të tilla, por ky operacion konsiderohet ndër më të mëdhenjtë gjatë muajve të fundit.
Pritet që në orët në vazhdim Policia e Korçës të dalë me një komunikatë zyrtare, ku do të bëhen publike rezultatet e para të këtij aksioni, si dhe masat konkrete që do të merren ndaj personave të identifikuar si organizatorë apo përfitues nga bastet sportive ilegale.
