Kanali kryesor i përçimit të ujit për vaditje në hyrje të Lushnjes po përballet me ndotje të madhe nga mbetjet plastike, duke bllokuar qarkullimin e ujit dhe vështirësuar jetesën e banorëve.
Kanali përçues i ujit në hyrje të qytetit të Lushnjes është një vepër e rëndësishme inxhinierike, e cila furnizon me ujë të gjithë zonën e Myzeqesë, duke kaluar përmes fshatrave dhe vetë qytetit. Uji vjen nga rezervuari i Thanës dhe rrjedh drejt fushave bujqësore, por situata në kryqëzimin e ish-fabrikës së qumështit është kthyer në një shqetësim të madh. Nënkalimi i tubacioneve të kanalit, pranë kësaj zone, është problematik për drejtuesit e bordit të kullimit të Qarkut Fier, por edhe për banorët përreth.
Në këtë pjesë të kanalit është e pamundur të qëndrosh për shkak të grumbullimit të mbeturinave, të cilat krijojnë një shtresë të dendur plastike mbi sipërfaqen e ujit. Bidonët dhe mbetjet e riciklueshme, të hedhura pa kontroll, përhapen shpejt, ndërsa banorët ankohen për erën e rëndë që mbulon gjithë lagjen dhe dëmton ambientin.
Prej më shumë se 35 vitesh, ky nënkalim është kthyer në arterien kryesore të qarkullimit të ujit për ujitje në Lushnje. Megjithatë, bllokimi nga mbeturinat e ka bërë të nevojshme ndërhyrjen e vazhdueshme të mjeteve pastruese. Problematike mbeten edhe ndërtimet e paligjshme përgjatë kanalit, të cilat janë shfaqur pas viteve ’90, duke penguar mirëmbajtjen dhe funksionimin normal të veprës publike.
Banorët fajësojnë institucionet për mungesë vëmendjeje dhe pasivitet në zbatimin e ligjeve që ndalojnë ndërtimet mbi kanale. Sipas tyre, ndërhyrjet e qytetarëve me ndërtime të paligjshme jo vetëm që rrezikojnë sigurinë e veprës, por edhe ulin efektivitetin e vaditjes për të mbjellat e fermerëve.
Fenomeni ka të paktën 30 vjet që vijon, ndërsa problemi kryesor mbetet hedhja e mbeturinave dhe ndërtimet mbi kanale, duke krijuar një cikël të përhershëm ndotjeje. Përveç mbetjeve plastike, kanalet janë kthyer në pika të grumbullimit të lëngjeve të baxhove dhe materialeve inerte, duke e rënduar akoma më shumë situatën.
Moszbatimi i ligjit dhe mungesa e kontrolleve kanë shndërruar këtë kanal të rëndësishëm vaditës në një kolektor të madh mbetjesh, duke rrezikuar jo vetëm ujin e pijshëm dhe të vaditjes, por edhe shëndetin publik. Banorët kërkojnë ndërhyrje të menjëhershme nga autoritetet, për të rikthyer funksionalitetin dhe pastërtinë e kanalit.
Raporton nga Lushnja, gazetari Ndriçim Gjoshi.
