Raporti i Deloitte zbulon rritje të ndjeshme të çmimeve të apartamenteve në Shqipëri gjatë vitit 2024, duke e renditur vendin mes tregjeve më të shtrenjta të Europës.
Shqipëria është përfshirë për herë të parë në raportin prestigjioz “Deloitte Property Index 2025”, duke u renditur ndër vendet me rritjen më të lartë të çmimeve të apartamenteve në kontinent. Çmimi mesatar arriti 1,620 euro për metër katror në vitin 2024, me një rritje vjetore prej 16.6%, duke e pozicionuar vendin menjëherë pas Polonisë, ku shtrenjtimi u nxit nga politika të fuqishme subvencionimi.
Raporti thekson se nëntë vende europiane regjistruan rritje mbi 10%, mes tyre Hungaria, Kroacia, Rumania, Italia dhe Greqia. Në kontrast, Turqia ishte i vetmi vend me ulje të theksuar të çmimeve, duke pësuar rënie prej 12%. Shqipëria spikati në këtë panoramë për rritjen e fortë të çmimeve sidomos në Tiranë dhe Vlorë, ku tregu i banesave është në transformim të shpejtë.
Në Tiranë, çmimi mesatar i apartamenteve arriti 2,000 euro për metër katror, ndërsa në Vlorë shkoi deri në 2,400 euro. Edhe Durrësi regjistroi rritje, me çmime rreth 1,350 euro për metër katror. Këto qytete po tërheqin interes të shtuar nga blerës vendas dhe të huaj, me Vlorën që përfiton nga turizmi dhe projektet e reja infrastrukturore si Aeroporti, Bypassi dhe Tuneli i Llogarasë.
Rritje të ndjeshme kanë pasur edhe qiratë. Në Vlorë qiratë u rritën me 25%, ndërsa në Durrës me 22.5%, kryesisht për shkak të kërkesës së lartë për qira afatshkurtra. Në Tiranë, apartamentet 1+1 arrijnë tashmë deri në 800 euro në muaj, të nxitura nga turizmi dhe qëndrimet e shkurtra.
Ndër qytetet europiane, Tirana dhe Vlora u renditën pranë Krakovit dhe Jerusalemit për rritje të çmimeve, duke shënuar +25%. Ky fakt e bën Shqipërinë një rast studimi të veçantë, pasi ndërthur kërkesën e lartë, zhvillimin urban dhe turizmin në një treg ende të brishtë për përballueshmërinë e qytetarëve.
Në fund, raporti thekson se Shqipëria po hyn në hartën europiane të pasurive të paluajtshme si një vend me potencial të lartë investimesh, por edhe me sfida serioze për shtresat e mesme e të ulëta, të cilat përballen çdo ditë me vështirësi në sigurimin e një banese.
