Shtetet e Bashkuara të Amerikës kanë uruar popullin shqiptar me rastin e Ditës së Pavarësisë, duke theksuar marrëdhëniet e ngushta mes dy vendeve dhe rolin e Shqipërisë në sigurinë rajonale dhe euroatlantike.
Në mesazhin zyrtar të Sekretarit të Shtetit, Marco Rubio, përcillet urimi:
“Në emër të Shteteve të Bashkuara të Amerikës, dua të uroj popullin e Shqipërisë në festën e Pavarësisë.”
Në deklaratë theksohet se partneriteti mes SHBA-së dhe Shqipërisë bazohet në angazhimin e përbashkët për një të ardhme më të sigurt dhe më të begatë. Po ashtu, nënvizohet rëndësia e aleancës në kuadër të NATO-s, e cila mbetet një themel i mbrojtjes së ndërsjellë.
Administrata amerikane vlerëson bashkëpunimin e ngushtë me institucionet ligjzbatuese shqiptare në luftën kundër krimit të organizuar, trafikimit ndërkombëtar të drogës dhe rrjeteve kriminale transnacionale. Në mesazh përmendet edhe bashkëpunimi i forcuar në fushën e sigurisë kibernetike dhe hapat e rëndësishëm të ndërmarrë nga Shqipëria në këtë drejtim.
Mesazhi përmbyllet me angazhimin e SHBA-së për të zgjeruar më tej bashkëpunimin në fushën e sigurisë, ekonomisë dhe marrëdhënieve dypalëshe, duke theksuar miqësinë e qëndrueshme mes dy vendeve.
