Ervin Salianji, nga qelia e tij në burgun e Fierit, ka publikuar një letër ku deklaron se do të ndjekë deri në fund betejën për drejtësi.
Deputeti, i dënuar me një vit burg për një denoncim publik, shprehet i vendosur ta çojë çështjen e tij në Gjykatën Evropiane të të Drejtave të Njeriut në Strasburg. “Do ta kërkoj të drejtën deri në fund të botës, sa të kem frymë,” shkruan ai në letrën e tij.
Në letrën e titulluar “Letër nga qelia 6”, Salianji përshkruan momente reflektimi nga burgu i Fierit, duke kujtuar edhe ngjarje të mëdha ndërkombëtare, si betimi i Donald Trump. Ai vë theksin tek idetë e demokracisë, duke reflektuar mbi parimet themelore të pushtetit që burojnë nga njerëzit. “Mos harroni në asnjë moment se pushteti juaj vjen nga njerëzit,” shkruan Salianji, duke cituar një senator amerikan dhe duke e krahasuar këtë koncept me realitetin në Shqipëri.
Sipas tij, në Shqipëri, pushteti ka humbur lidhjen me burimin e tij legjitim – qytetarët. Ai akuzon qeverinë aktuale për devijimin e pushtetit dhe krijimin e qendrave okulte që i shërbejnë interesave private. “Autokratuci sot mendon se burimi i pushtetit është ai vetë,” shprehet Salianji, duke theksuar se qytetarët janë kthyer në spektatorë, të përjashtuar nga proceset vendimmarrëse.
Në këtë kontekst, Salianji ndan edhe përvojën e tij personale, duke akuzuar qeverinë për përdorimin e drejtësisë si mjet për të përndjekur kundërshtarët politikë. “Jam në qelinë numër 6, sepse bëja betejë për interesin publik,” shkruan ai, duke theksuar se ndodhet pas hekurave pa prova konkrete, vetëm për një deklaratë publike që rezultoi e vërtetë. Ai nënvizon se i dënuari i denoncuar prej tij tashmë po vuan dënimin për trafik ndërkombëtar droge, ndërsa vetë Salianji vazhdon të jetë peng i një sistemi të deformuar.
Deputeti thekson se drejtësia në Shqipëri ka humbur pavarësinë dhe po përdoret si një armë politike. Ai paralajmëron se ky precedent rrezikon lirinë e fjalës dhe të gjithë ata që guxojnë të kundërshtojnë qeverinë. “Nëse ky turp qëndron në fuqi, çdo njeri që do të thotë diçka kundër Kryeministrit, mund të përfundojë në qeli,” shprehet ai.
Për Salianjin, shpresa e vetme për ndryshim qëndron tek qytetarët dhe vota e tyre, përfshirë diasporën. Ai bën thirrje për mobilizim masiv në zgjedhjet e ardhshme, duke i konsideruar ato si mundësinë e fundit për të rikthyer pushtetin te njerëzit. “Qytetarët janë garancia për ta ruajtur Republikën,” përfundon ai, duke shtuar se 11 maji mund të jetë dita kur njerëzit t’i tregojnë Kryeministrit se ekzistojnë dhe se pushteti buron prej tyre.
Letra e Salianjit reflekton jo vetëm sfidën e tij personale, por edhe një kritikë të thellë ndaj gjendjes së demokracisë dhe drejtësisë në Shqipëri. Ai e përfundon letrën me një mesazh të fortë, duke theksuar vendosmërinë e tij për të luftuar për të drejtën deri në fund të botës.
