Kryetari i Partisë Demokratike, Sali Berisha, gjatë një takimi me të deleguarit në qarkun e Tiranës, e nisi fjalimin e tij duke analizuar zhvillimet e fundit në SHBA, pas inaugurimit të Donald Trump si president i vendit.
Ai e cilësoi këtë ngjarje si një transformim të jashtëzakonshëm, jo vetëm për SHBA-në, por për të gjitha kombet që çmojnë lirinë.
“Në këto ditë të para në krye të Shtëpisë së Bardhë, Donald Trump ka realizuar ndryshime të mëdha, duke vepruar më shumë sesa shumë liderë gjatë një mandati të plotë. Këto ndryshime janë një mrekulli jo vetëm për kombin amerikan, por për gjithë njerëzit e lirë në botë,” u shpreh Berisha.
Ai vlerësoi angazhimin e presidentit amerikan për një transformim të thellë, duke theksuar se ndryshimet që Trump ka nisur do të ndikojnë jo vetëm në SHBA, por edhe në vendet që janë ndikuar nga politika amerikane ndër vite. Berisha veçoi se reformat e Trump kanë çmontuar, siç ai tha, “doktrinën e ekstremit të majtë marksist-leninist dhe post-marksist të frymëzuar nga George Soros.”
Një nga pikat që Berisha përmendi me forcë ishte vendimi i presidentit amerikan për të ndaluar promovimin e agjendave që, sipas tij, kanë përçudnuar konceptin e familjes. “Trump i dha fund doktrinave që kërkonin të ndryshonin konceptet natyrore dhe hyjnore të familjes. Ai bëri të qartë se në SHBA, gjinitë do të jenë ato që Zoti ka falur: burrë dhe grua,” deklaroi Berisha.
Berisha e lidhi këtë zhvillim me situatën në Shqipëri, duke theksuar se vendi ynë ka qenë, sipas tij, “kopshti eksperimental i doktrinave të Sorosit.” Ai vlerësoi se dekrete të tilla historike do të ndihmojnë në shmangien e ndikimeve të mëtejshme të këtyre agjendave në Shqipëri. “Shqipëria ka përfituar më shumë se çdo vend tjetër nga këto vendime të Donald Trump, sepse ato ndalojnë përdorimin e fuqisë dhe fondeve amerikane për të promovuar agjenda të tilla,” tha Berisha.
Ndër të tjera, Berisha solli në vëmendje paralajmërimet e mëparshme për ndikimin e ideologjive të huaja në vendin tonë dhe e cilësoi si jetike nevojën për të ndjekur një shembull që mbështet vlerat tradicionale.
Ai përfundoi duke theksuar se Shqipëria duhet të përfitojë maksimalisht nga këto ndryshime në politikën amerikane dhe të ndjekë një model që ruan vlerat e saj kombëtare dhe tradicionale.
