Në një ngjarje të zhvilluar nga Klubi Ekonomik i Shikagos, Kryetari i Rezervës Federale, Jerome Powell, bëri një paralajmërim të fortë lidhur me pasojat e mundshme ekonomike nga tarifat që presidenti Donald Trump ka vendosur. Ai theksoi se ndryshimet e politikave të Trumpit janë shumë të thella dhe nuk ka një eksperiencë moderne për t’i vlerësuar ato.
“Janë ndryshime shumë themelore të politikave”, tha Powell. “Nuk ka një eksperiencë moderne se si duhet të mendojmë për këtë.” Në këtë kontekst, ai nënvizoi se rritjet e tarifave të paralajmëruara deri tani janë shumë më të mëdha se ato që ishin pritur dhe se pasiguria e vazhdueshme mund të dëmtojë ekonominë për një periudhë të gjatë.
Në deklaratën e tij, Powell theksoi se tarifat e Trumpit po e dërgojnë ekonominë në një udhëkryq të vështirë, ku rritja e ngadalshme ekonomike, rritja e papunësisë dhe inflacioni do të përballen së bashku. Kjo është një situatë që Rezerva Federale nuk ka përjetuar për më shumë se gjysmë shekulli.
Ndërkohë, aksionet në Shtetet e Bashkuara ranë pas këtyre paralajmërimeve. Dow ra me 700 pikë (1.7%), ndërsa S&P 500 ra me 2.5%, dhe Nasdaq u ul me 3.5%. Ky është një pasqyrë e ndikimeve të menjëhershme të politikave të Trumpit.
Kryetari i Rezervës Federale sqaroi se ndonëse ekonomia e SHBA-së mbetet relativisht në gjendje të mirë për momentin, tarifat e Trumpit janë të rrezikshme për të dy objektivat kryesore të Rezervës Federale: promovimin e punësimit të plotë dhe kontrollin e inflacionit.
Deri tani, administrata Trump ka vendosur tarifa 25% për alumini dhe çelik, tarifa 25% për produktet që nuk janë të pajtueshme me marrëveshjen e tregtisë së lirë me Meksikën dhe Kanadanë, si dhe një tarifë prej 145% për importet nga Kina. Gjithashtu, ka tarifuar 25% për makinat, me tarifa të tjera që do të vijnë për pjesët e makinave.
Një tjetër shqetësim është se tarifat që do të rinisen në korrik do të shkaktojnë një rritje të inflacionit, papunësisë dhe një ngadalësim të mëtejshëm të rritjes ekonomike. Megjithatë, shumë ekonomistë presin që pasojat të bëhen më të dukshme në muajt në vazhdim, veçanërisht nëse Trump vendos të shtojë tarifat ndaj produkteve të tjera, përfshirë semikondaktorët, farmaceutikët, bakrin dhe drurin.
Powell tha gjithashtu se është e mundur që inflacioni të rritet dhe që një pjesë e rëndesës nga tarifat do të paguhet nga publiku. Ai përfundoi se nëse situata përkeqësohet dhe ekonomia fillon të ndjekë një udhë që i ngjan stagflacionit, do të shqyrtohen mënyra për të arritur qëllimet e Rezervës Federale, megjithëse pa ndikuar shumë te shoqëria dhe bizneset.
Në këtë situatë të pasigurtë, ka pasur mendime të ndryshme se cila do të ishte reagimi më i mirë nga ana e Rezervës Federale. Ndërkohë që ekonomistët po analizojnë më tej pasojat, Powell dhe kolegët e tij janë të vendosur të monitorojnë me kujdes të dhënat e ardhshme për të përcaktuar veprimet e ardhshme të mundshme.
