Gjykata më e Lartë e Mbretërisë së Bashkuar ka shpallur një vendim që do të ketë pasoja të mëdha për mënyrën se si zbatohet ligji i barazisë. Ajo ka vendosur unanimisht se përkufizimi i gruas në legjislacionin për barazi lidhet me një “grua biologjike dhe seks biologjik,” duke shkaktuar gëzim mes aktivistëve që kundërshtojnë të drejtat e grave transgjinore, por gjithashtu duke alarmuar për një zhvillim të “shqetësueshëm” për këtë komunitet.
Rasti i ngritur nga një grup aktivistësh në Skoci në vitin 2018, kishte si qëllim të përcaktonte nëse gratë transgjinore, të cilat kanë një certifikatë të njohjes së gjinise (GRC), janë të mbrojtura nga diskriminimi sipas Ligjit të Barazisë të vitit 2010. Aktivistët e Skocisë argumentuan se këto të drejta duhen mbrojtur vetëm për ata individë që janë caktuar si gra që në lindje, ndërsa qeveria skoceze tha se një grua transgjinore me GRC është ligjërisht një grua dhe duhet të gëzojë mbrojtjen e njëjtë ligjore.
Edhe pse rasti ka të bëjë me një ligj të Skocisë që synon të rrisë përfaqësimin e grave në bordet drejtuese, vendimi i datës së mërkurë do të ndikojë në debatet gjithnjë e më të polarizuara mbi të drejtat e personave transgjinorë në të gjithë Mbretërinë e Bashkuar. Partia Laburiste e Mbretërisë së Bashkuar tha se ky vendim ka sjellë “qartësi dhe besim,” ndërsa Partia Konservatore e quajti atë një “fitore të qartë për shëndetin e arsyes,” duke kërkuar që qeveria të ndryshojë udhëzimet ekzistuese.
Gjykatësit vendosën në favor të grupit “For Women Scotland” (FWS), i cili argumentoi se lidhja e përkufizimit ligjor të gjinive me seksin biologjik do të kishte pasoja për shërbimet e ndara sipas gjinive, përfshirë dhomat e ndërrimit, strehëzat dhe akomodimin komunitar. “Termat grua dhe seks në Ligjin e Barazisë të vitit 2010 lidhen me gruan biologjike dhe seksin biologjik,” tha Lordi Patrick Hodge në sallën e gjykatës.
Vendimi gjithashtu theksoi se gratë transgjinore mund të përjashtohen nga objektet dhe shërbimet e ndara sipas gjinive, si dhomat e ndërrimit, vetëm nëse kjo është “proporcionale.” Nëse gratë transgjinore me GRC do të gëzonin të njëjtat të drejta të mbrojtura si gratë biologjike sipas Ligjit të Barazisë, ato do të kishin “të drejta më të mëdha se ato që nuk kanë,” tha Hodge.
Megjithatë, ai siguroi se ky interpretim i Ligjit të Barazisë të vitit 2010 “nuk heq mbrojtjen nga njerëzit transgjinorë,” pavarësisht nëse kanë një dokument GRC apo jo. Nëse një grua transgjinore ndjehet e diskriminuar për shkak të ndryshimit të gjinive, ajo mund të kërkojë mbrojtje ligjore në këtë bazë.
Përfaqësuesit e qeverisë britanike thanë se ata kanë mbështetur gjithmonë mbrojtjen e hapësirave të ndara sipas gjinive dhe kjo është një mbrojtje ligjore që do të vazhdojë të mbrohet. Pas vendimit, aktivistët transgjinorë në mbarë botën kanë ngritur shqetësime për ndikimin që ky vendim mund të ketë në jetën e tyre të përditshme dhe të drejtat e tyre të mbrojtura.
