Kryeministri Edi Rama ka reaguar ndaj një komenti në rubrikën e tij “SY MË SY” në Facebook, ku një qytetar e kritikoi për vëmendjen e pamjaftueshme ndaj pensionistëve dhe furnizimit me ujë të pijshëm.
Përgjigjja e Ramës ishte e drejtpërdrejtë, duke theksuar se qeveria aktuale është ajo që ka bërë më shumë se cilado tjetër për pensionistët dhe këto çështje mbeten pjesë e prioriteteve të saj.
Në koment, qytetari shprehte shqetësimin për pensionistët dhe furnizimin me ujë të pijshëm, duke kërkuar më shumë angazhim në këto fusha. Në reagimin e tij, Rama pranoi se gjithmonë ka hapësirë për përmirësim, por theksoi se qeveria e drejtuar nga Partia Socialiste ka ndërmarrë hapa të rëndësishëm, duke përmendur reformën e pensioneve si një nga arritjet kryesore.
“Kjo qeveri ka realizuar një reformë të thellë të sistemit të pensioneve, që ka rritur ndjeshëm përfitimet për ata që kanë dalë në pension gjatë 10 viteve të fundit,” tha Rama. Ai nënvizoi gjithashtu dhënien e dy bonuseve vjetore për pensionistët, një praktikë që, sipas tij, do të vazhdojë edhe në vitet e ardhshme.
Duke ironizuar opozitën, kryeministri tha se kundërshtarët politikë ofrojnë “premtime absurde”, duke i krahasuar ato me “qilimat fluturues” të piramidave financiare të Sudes dhe Xhaferrit në vitet ’90. Sipas Ramës, këto premtime janë pa bazë dhe të papërgjegjshme.
Ai gjithashtu theksoi rëndësinë e kujtesës historike, duke përmendur se shumë pensionistë e dinë mirë se kush “e bëri Shqipërinë lesh e li” dhe se aritmetika e progresit ekonomik është më e qartë për ata sesa për politikanët opozitarë.
“Ne nuk pretendojmë të jemi të përkryer, por më të mirë se ne ky vend nuk ka pasur dhe nuk do të gjejë për të paktën 10 vitet e ardhshme,” shtoi Rama, duke shprehur besimin se qeveria e tij do të vazhdojë të ofrojë rezultate konkrete për qytetarët.
Në fund, kryeministri siguroi qytetarët se ekonomia shqiptare është në rritje të qëndrueshme dhe përfitimet e saj do të ndahen me kujdes edhe për pensionistët. Ai i bëri thirrje publikut të mos bjerë pre e premtimeve boshe dhe të mbështesë politikat që sjellin rezultate të prekshme.
