vDeputetja Jorida Tabaku ka reaguar ashpër pas ndërhyrjes së Policisë gjatë protestës së zhvilluar përpara Kryeministrisë, duke akuzuar qeverinë për dhunë ndaj protestuesve paqësorë.

Në reagimin e saj publik, Kryetarja e Komisionit Parlamentar për Median dhe të Drejtat e Njeriut theksoi se protesta nuk është krim, por një e drejtë kushtetuese e qytetarëve.

Ajo deklaroi se protestuesit nuk kanë ushtruar dhunë dhe nuk kanë përbërë rrezik për rendin publik, ndërsa reagimi i institucioneve, sipas saj, ka qenë i pajustifikuar.

“Dhuna ndaj protestuesve paqësorë është shenjë e një pushteti të frikësuar,” u shpreh Tabaku, duke shtuar se standardet europiane kërkojnë që policia të garantojë protestën dhe jo ta shtypë atë.

Tabaku e lidhi këtë sjellje me, sipas saj, keqpërdorimin e forcës shtetërore dhe theksoi se dhuna nuk është shenjë force, por dobësie.

Reagimi i saj vjen në një moment tensioni të shtuar politik, ndërsa protestat përpara Kryeministrisë kanë sjellë përplasje mes protestuesve dhe Policisë, duke nxitur reagime të forta nga opozita.