Kryebashkiaku i Lezhës, Pjerin Ndreu, ka reaguar me ironi pas denoncimit të deputetit demokrat, Agron Gjekmarkaj, i cili pretendon se Bashkia e Lezhës po ushtron presion ndaj punonjësve të administratës për mbledhje votash në këmbim të ruajtjes së vendeve të punës.
Ndreu e ka mohuar kategorikisht këtë akuzë, duke shigjetuar denoncimin me një qasje ironike dhe humoristike.
Në një postim publik, Ndreu shkruan: “Babën në punë në bashki, po i bëjnë presion administratës thotë! Po baba ça thotë? Kush i ka bërë presion? Kujt iu bë presion?”
Ai vazhdon me një koment sarkastik për një pretendim të përfshirë në denoncim, ku një kuzhinier në Shëngjin ankohej për presionin e ushtruar ndaj administratës. “Ka shkruar një kuzhinier në Shëngjin se po i bëjnë presion administratës! Edhe kuzhinierët janë në administratë?! Këta nuk njohin babën, jo më të dinë se kuzhinieri nuk është administratë!” tha Ndreu.
Deputeti demokrat Agron Gjekmarkaj kishte publikuar një denoncim nga një qytetar, ku pretendohej se persona të njohur nga “Dosja 184” po ushtronin presion ndaj punonjësve të administratës për të siguruar vota, me kërcënimin se në të kundërt ata do të largoheshin nga puna.
Gjekmarkaj, i cili është drejtues politik i opozitës për qarkun e Lezhës, akuzoi Ndreun dhe ministrin socialist Ulsi Manja, duke thënë se përpjekjet e tyre për presion dhe manipulim nuk do të ndryshojnë vullnetin e qytetarëve.
Reagimi i Ndreut vjen si kundërpërgjigje për këto akuza, të cilat ai i konsideron të pabaza dhe të motivuara politikisht. “Këto janë shpifje që nuk kanë asnjë bazë. Administrata jonë punon për qytetarët dhe jo për interesa të tjera,” deklaroi ai.
Ndërkohë, denoncimet për presione mbi administratën publike në prag të zgjedhjeve mbeten një çështje e ndjeshme, duke ngritur pikëpyetje mbi standardet demokratike dhe integritetin e procesit zgjedhor në vend.
Ironia dhe akuzat mes dy palëve vetëm sa thellojnë tensionet politike në Lezhë, ndërsa qytetarët presin me interes zhvillimet e mëtejshme rreth këtyre pretendimeve.
