Këtë të shtunë, emisioni “Personazhe në Fokus” sjell për teleshikuesit një takim të veçantë me poeten, shkrimtaren dhe gazetaren Aurora Damini, një grua që prej vitesh i ka kushtuar jetën fjalës së shkruar dhe pasqyrimit të realitetit përmes gazetarisë.

Përballë gazetarit Ndriçim Gjoshit,

Aurora Damini rrëfen rrugëtimin e saj profesional, sakrificat e një karriere të gjatë në gazetari dhe lidhjen e veçantë me letërsinë, prozën dhe poezinë. Një rrëfim i ndjerë mbi jetën, kujtimet, sfidat dhe emocionet që kanë lënë gjurmë në krijimtarinë e saj.

E lindur në qytetin e Fier, Aurora Damini është diplomuar në Gjuhë-Letërsi Shqipe në Universitetin e Elbasanit dhe ka vijuar studimet pasuniversitare në Universitetin Shtetëror të Tetovës, ku ka marrë gradën “Magjistër i letërsisë shqipe”.

Rrugëtimin në publicistikë e nisi në vitin 1998, ndërsa krijimtaria e saj letrare përfshin poezi, prozë poetike dhe studime letrare. Ndër veprat e saj janë “Po nesër?!”, “Kali i bardhë i ëndrrës” dhe studimi mbi prozën e Jakov Xoxës.

Përmes fjalës, Aurora Damini sjell një botë të mbushur me mall, ndjeshmëri dhe melankoli, ku përvojat e jetës shndërrohen në letërsi e poezi.

Një bisedë e hapur dhe një rrëfim njerëzor për forcën e fjalës dhe pasionin për krijimtarinë.

“Personazhe në Fokus”, këtë të shtunë, ora 21:00, në TV Apollon.