Vendimi i bordit drejtues për të larguar nga ekipi golashënuesin kryesor, Rei Manaj, ka shkaktuar polemika të mëdha në klubin e Sivasporit, në një moment kritik për mbijetesën e skuadrës në elitën e futbollit turk.
Sivaspori gjendet aktualisht në një pozitë tepër të vështirë në kampionatin turk, duke u renditur në vendin e 17-të me 35 pikë pas 34 javësh, çka i vë seriozisht në rrezik për të rënë nga kategoria. Ky sezon ka sjellë sfida të mëdha për ekipin, ndërsa lufta për mbijetesë është bërë edhe më e ashpër në javët e fundit.
Mediat turke kanë raportuar së fundmi për një vendim të papritur nga bordi drejtues i klubit, i cili ka zgjedhur të përjashtojë nga ekipi yllin e sulmit, Rei Manaj. Ky vendim është konsideruar absurd nga opinioni sportiv, sidomos duke pasur parasysh kontributin e tij të rëndësishëm në sulm.
Manaj është golashënuesi më i mirë i Sivasporit këtë sezon, me 12 gola dhe 5 asiste të realizuara në 27 ndeshje të luajtura, duke qenë një prej faktorëve kryesorë për shpresat e klubit për të qëndruar në elitë. Megjithatë, pas një ndeshjeje të mbyllur pa gola ndaj Bodrum KF, trajneri Rıza Çalımbai kritikoi hapur performancën e tij, çka sipas mediave vendase, ka ndikuar drejtpërdrejt në vendimin e bordit.
Ky largim vjen në një periudhë ku çdo pikë është vendimtare për skuadrën, dhe humbja e një lojtari kyç si Manaj mund të ndikojë negativisht në përpjekjet për të shmangur rënien nga kategoria. Vendimi ka nxitur diskutime të forta si mes tifozëve ashtu edhe në radhët e specialistëve të futbollit turk.
Në fundjavë, Sivaspori do të ketë një sfidë të rëndësishme në transfertë kundër Samsunsporit, që mban vendin e katërt në renditje. Mungesa e Manajt pritet të ndihet fort, duke rritur edhe më shumë presionin mbi skuadrën dhe stafin teknik në këtë fund sezoni të tensionuar.
