Ish-Princi Andrew është larguar nga rezidenca Royal Lodge në Windsor dhe është zhvendosur përkohësisht në pronën Sandringham Estate në Norfolk, në vijim të zhvillimeve të fundit që lidhen me publikimin e dokumenteve të reja mbi çështjen e financierit Jeffrey Epstein.

Sipas informacioneve zyrtare nga rrethet mbretërore, largimi nga Royal Lodge ka ndodhur mbrëmjen e së hënës, ndërsa Andrew aktualisht po qëndron në Wood Farm Cottage. Rezidenca e tij e mëparshme do t’i nënshtrohet punimeve restauruese.

Megjithëse ishte njoftuar më herët se zhvendosja do të realizohej në fillim të vitit 2026, reagimet e forta publike pas publikimit të dokumenteve të fundit që lidhen me dosjen Epstein duket se e kanë përshpejtuar këtë vendim.

Ndërkohë, presioni ndaj Andrew Mountbatten-Windsor për të dhënë dëshmi në Shtetet e Bashkuara lidhur me marrëdhënien e tij me Epstein është rritur. Ai ka mohuar vazhdimisht çdo përfshirje apo shkelje ligjore, por emri i tij vijon të përmendet në kontekstin e hetimeve dhe dokumenteve të publikuara.

Largimi nga Royal Lodge ishte paralajmëruar që në muajin tetor, në të njëjtën periudhë kur Andrew humbi zyrtarisht titullin e princit. Sandringham Estate është pronë private e Mbretit Charles III, i cili do të mbulojë shpenzimet e qëndrimit të vëllait të tij. Burime pranë familjes mbretërore bëjnë të ditur se destinacioni i tij përfundimtar pritet të jetë Marsh Farm, brenda të njëjtës pronë.

Çështja e ish-Princit Andrew vijon të mbetet një problem i ndjeshëm për Familjen Mbretërore. Menaxhimi i situatës së tij është shoqëruar me kritika të vazhdueshme, ndërsa qëndrimi i tij në Royal Lodge ishte kthyer në simbol të debatit publik mbi privilegjet, transparencën dhe përdorimin e burimeve, për shkak të lidhjeve të tij me Jeffrey Epstein.