Papa Francesku do të dalë sot nga spitali “Gemelli” në Romë pas një shtrimi prej 38 ditësh, gjatë të cilave ai u trajtua për pneumoni bilaterale dhe infeksion respirator polimikrobik.
Pas kësaj periudhe të gjatë rikuperimi, Papa do të kthehet në rezidencën e tij në Santa Marta, ndërsa mjekët kanë theksuar se ai do të duhet të respektojë një periudhë të mëtejshme pushimi dhe rikuperimi që mund të zgjasë të paktën dy muaj.
Gjendja shëndetësore e Papa Franceskut ka shfaqur përmirësime të dukshme gjatë javës së fundit, dhe ai ka shprehur dëshirën për t’u rikthyer sa më shpejt në Vatikan. Pavarësisht se gjatë kësaj periudhe ka qëndruar i tërhequr dhe më pak i dukshëm, ai ka dëshiruar të jetë pranë besimtarëve, veçanërisht në këtë periudhë të shenjtë të Pashkëve.
Me daljen e tij nga spitali, agjenda e Papës pritet të ndryshojë ndjeshëm. Pjesëmarrja e tij në ritet e Pashkëve do të varet nga përparimi i shëndetit. Mjekët janë të kujdesshëm në lidhje me mundësinë që ai të udhëtojë në Turqi në fund të majit, pasi nuk ka ende një siguri të plotë për realizimin e këtij udhëtimi.
Gjatë fazës së rikuperimit, Papa do të shmangë takimet me grupe të mëdha besimtarësh, pasi ato mund të jenë të dëmshme për shëndetin e tij. Pavarësisht kësaj, mjekët konfirmojnë se gjendja klinike e Papa Franceskut ka qëndruar e qëndrueshme për dy javë dhe se ai ka filluar të ndjehet më mirë. Ai nuk ka pasur më nevojë për maskë oksigjeni gjatë natës, ka nisur të ushqehet normalisht dhe ka rikthyer energjinë e tij të zakonshme.
Një faktor tjetër që ka ndikuar në vendimin për ta kthyer Papa Franceskun në Vatikan ka qenë rreziku i infeksioneve spitalore, të cilat janë një shqetësim i veçantë për pacientët e moshuar pas sëmundjeve të rënda. Mjekët kanë rekomanduar që ai të reduktojë përdorimin e antibiotikëve oralë dhe të marrë një pushim të plotë.
Lajmi i largimit të Papa Franceskut nga spitali u dha gjatë lutjes së mbrëmjes të djeshme nga Monsinjor Giordano Piccinotti, president i APSA-s, dhe u prit me duartrokitje nga besimtarët që ishin të pranishëm. Mjekët janë optimistë për përmirësimet e shpejta të Papa Franceskut, veçanërisht për sa i përket rikuperimit të zërit të tij, i cili u dëmtua nga pneumonia bilaterale.
Papa do të vazhdojë terapitë e tij në Vatikan, ndërsa mjekët shpresojnë për një rikuperim të shpejtë, edhe pse përmirësimet janë ende të vështira për t’u parashikuar.
