Ministri i Brendshëm, Ervin Demo, ka prezantuar dy drejtuesit e rinj që do të angazhohen në çështjet e vetëqeverisjes vendore.

Oltjon Muzaka merr detyrën e zëvendësministrit, me përgjegjësi për ndjekjen e çështjeve të pushtetit vendor, ndërsa Anxhela Paparizo është emëruar drejtoreshë e re e Agjencisë për Mbështetjen e Vetëqeverisjes Vendore.

Në fokus të punës së ekipit të ri janë disa prej sfidave kryesore me të cilat përballen sot bashkitë.

Reformat në proces, përmbushja e detyrimeve që lidhen me Kapitullin 22, digjitalizimi i shërbimeve, forcimi i kapaciteteve të bashkive dhe përmirësimi i shërbimeve për qytetarët janë ndër prioritetet e përcaktuara.

Por puna nuk ndalet vetëm te administrimi i përditshëm.

Programet “Paketa e Maleve” dhe “Rilindja Urbane 2.0” synojnë të përkthehen në zhvillim konkret në territor, duke krijuar më shumë mundësi për komunitetet dhe duke sjellë një profil të ri për qytetet dhe zonat rurale.

Përballë këtyre objektivave, kërkohet koordinim më i fortë mes strukturave, drejtim dhe angazhim maksimal nga i gjithë ekipi.

Synimi i shpallur është ndërtimi i një pushteti vendor më të aftë dhe më modern, me shërbime më pranë qytetarëve dhe me një rol më të drejtpërdrejtë në zhvillimin e komuniteteve.