Kryebashkiaku i Tiranës, Erion Veliaj, ka vlerësuar rolin aktiv të shtetit në zhvillimin e pronave publike, duke theksuar transformimin nga një qasje pasive në një model sipërmarrës.
Në një prononcim për programin e zhvillimit të pronave publike, Veliaj deklaroi se “sot po shohim shtetin e sipërmarrjes”, duke e cilësuar këtë një hap të rëndësishëm për Shqipërinë.
“Shteti nuk është më inferior apo pasiv duke pritur që iniciativa të vijë nga diku tjetër. Sot shteti merr iniciativën dhe bashkëpunon me biznesin privat për të maksimizuar asetet,” tha Veliaj, duke shtuar se është krenar për këtë transformim.
Kreu i bashkisë nuk la pa përmendur edhe “histerinë kolektive” të privatizimeve të shpejta në të kaluarën. Duke iu referuar debatesh të mëparshme, ai theksoi transformimin e Pazarit të Ri, një zonë që, sipas tij, nga një hapësirë e degraduar është kthyer në një qendër moderne dhe tërheqëse.
“Nuk e di çfarë monumenti kulture kishte aty më parë – miu sa koka ime apo shëllira? Sot, vlera e pronës në Pazarin e Ri është rritur 3-4 herë dhe kjo zonë është kthyer në një nga më të frekuentuarat,” shtoi Veliaj, duke theksuar përmirësimin ekonomik dhe social të komunitetit përreth.
Kryebashkiaku përmendi edhe transformime të tjera të ngjashme, duke vlerësuar energjinë pozitive që këto projekte kanë sjellë në Tiranë. “Kur filluam rikonstruksionin e stadiumit ‘Selman Stërmasi’, ai ishte vetëm një parkim autobusësh. Sot, ajo çfarë kemi arritur duket si një përrallë krahasuar me të kaluarën,” tha ai.
Veliaj theksoi se këto transformime nuk janë thjesht investime fizike, por simbolizojnë kalimin nga një qasje e mësuar me degradimin, në një epokë të modernizimit dhe zhvillimit.
Programi për zhvillimin e pronave publike po shihet si një model që integron partneritetin mes sektorit publik dhe privat, duke synuar jo vetëm maksimizimin e vlerës së aseteve ekzistuese, por edhe përmirësimin e cilësisë së jetës për qytetarët.
“Është koha për të ndryshuar mënyrën si e shohim shtetin dhe si e përdorim potencialin e tij. Sot shteti nuk është thjesht administrator, por një sipërmarrës modern që krijon vlera të reja,” përfundoi Veliaj.
Ky program, i mbështetur nga praktikat më të mira ndërkombëtare, pritet të ndikojë ndjeshëm në zhvillimin urban dhe të promovojë një model më të qëndrueshëm për menaxhimin e pronave publike.
