Ministrja e Islandës për Fëmijët dhe Arsimin, Ásthildur Lóa Thórsdóttir, ka dhënë dorëheqjen nga posti i saj pas daljes në pah të një lidhjeje që ajo ka pasur me një adoleshent më shumë se 30 vjet më parë. Lidhja, e cila përfshinte lindjen e një fëmije, ka shkaktuar një reagim të fortë publik në vend.
Sipas raporteve të mediave islandeze, Thórsdóttir kishte filluar një marrëdhënie me një djalë 15-vjeçar kur ajo ishte 22 vjeç dhe kishte lindur një djalë nga ai. Transmetuesi publik i Islandës, RUV, raportoi se ajo e takoi djalin gjatë punës së saj si këshilltare për një grup fetar, dhe lindja e fëmijës ka ndodhur kur ajo ishte 23 vjeç dhe ai 16 vjeç.
Mosha e pëlqimit në Islandë është 15 vjeç, sipas kodit penal të vendit, megjithatë, ka ligje që e bëjnë të paligjshëm për të rriturit të kenë marrëdhënie seksuale me fëmijë nën 18 vjeç, nëse janë nën mbikëqyrjen e tyre. Kjo ka ngritur pyetje në lidhje me natyrën e marrëdhënies dhe me përgjegjësinë e Thórsdóttir në këtë rast.
Për më tepër, burimet raportuan se marrëdhënia ishte mbajtur e fshehtë për një kohë të gjatë, por babai i fëmijës ka kërkuar ndihmë nga Ministria e Drejtësisë dhe shërbimin e kishës për të pasur mundësi të shihte fëmijën e tij. Megjithatë, Thórsdóttir refuzoi të drejtat e vizitës, duke i ndërprerë kontaktin babait të fëmijës.
Pas shpërndarjes së raportit, Thórsdóttir dha dorëheqjen nga posti i ministres, duke pranuar përgjegjësinë për ngjarjen. Ajo theksoi se do të vazhdonte të përfaqësonte Partinë Popullore si deputete. Kryeministrja e Islandës, Kristrún Frostadóttir, ka konfirmuar se Thórsdóttir ka pranuar përgjegjësinë dhe ka dhënë dorëheqjen, pas një takimi me liderët e partive të vendit.
Frostadóttir, në një konferencë për shtyp, shpjegoi se ministrja kishte diskutuar hapur për këtë çështje dhe kishte marrë vendimin e saj të dorëheqjes. Ajo shtoi se zyra e kryeministrit do të vazhdojë hetimin e çështjes, megjithatë, theksoi se kjo ngjarje nuk ka të bëjë me punën e saj në qeveri.
Ky incident ka ngritur shqetësime në lidhje me ligjet për mbrojtjen e të miturve dhe ndikimin e tij në politikën islandeze, ndërsa shoqëria dhe mediat vazhdojnë të diskutojnë pasojat e këtij rasti të rëndë.
