Situata në Milan po bëhet gjithnjë e më e tensionuar, dhe shpresat për një ringritje shuhen dita-ditës.
Kriza që ka prekur klubin ka arritur një pikë kulminante, duke e lënë ekipin të përballet me një të ardhme të pasigurt. Giorgo Furlani, administratori i deleguar i Milanit, ka pranuar se gjendja aktuale është shumë e vështirë. Sidoqoftë, ai theksoi se ekipi është i bashkuar dhe se vetëm një forcë e tillë mund të sjellë daljen nga ky moment i vështirë. Furlani, gjithashtu, shpjegoi se nuk ka asnjë ngërç mes tij dhe Zlatan Ibrahimovic dhe se për momentin nuk është në diskutim ndryshimi i trajnerit.
Pavarësisht këtyre deklaratave të qeta, një tjetër problem i madh është ai i drejtorit të ri sportiv. Media italiane ka raportuar se gara për këtë pozicion ka dy kandidatë kryesorë: Fabio Paratici dhe Igli Tare. Ish-drejtori i Juventusit, Paratici, është takuar me përfaqësues të Milanit, përfshirë edhe investitorin Gerry Cardinale, për të diskutuar mundësinë e rikthimit të tij në futbollin milanez. Paratici ka kërkuar më shumë pushtet dhe garanci në administrimin e sektorit sportiv, ndërsa pozita e tij ende mbetet e pasigurt.
Nga ana tjetër, Igli Tare, aktualisht drejtues i Lazio-s, është një tjetër opsion i pëlqyer nga drejtuesit e Milanit dhe stafi i ekipit, përfshirë këtu edhe Ibrahimovic. Tare ka fituar simpatinë e të gjithëve për punën e tij në Lazio, ku, pavarësisht buxhetit të kufizuar, ka arritur të ndërtojë një ekip konkurrues dhe me rezultate pozitive. Tare është një emër që vazhdon të tërheqë vëmendjen e shumë klubeve dhe mund të jetë zgjidhja ideale për Milanin, që ka nevojë për një drejtues të fortë dhe me eksperiencë.
Çështja e zgjedhjes së drejtorit sportiv është bërë urgjente për Milanin, i cili kërkon të kthejë stabilitetin dhe të marrë vendime të shpejta për të shpëtuar sezonin. Sidoqoftë, është e sigurt që një ndërhyrje e fuqishme në këtë drejtim është e nevojshme për të rikthyer ekipin në rrugën e duhur. Nëse ky proces do të marrë një drejtim të saktë, Milan mund të shohë shpresa të reja për një ringritje të mundshme në sezonet e ardhshme.
Në këtë moment, fokusi i Milanit është te ndryshimet strukturore, për të rikthyer dinamizmin dhe fuqinë e dikurshme të klubit. Por, për të arritur këtë, nevojiten lëvizje të mençura dhe të shpejta në pozitat kyçe, përfshirë atë të drejtorit sportiv. Tashmë, gjithçka është në duar të Furlanit dhe të tjerëve që po e udhëheqin klubin në këtë periudhë të vështirë.
