LUSHNJE | KËNGË PARTIZANE DHE PATRIOTIKE NËN ATMOSFERËN E FESTAVE TË NËNTORIT, POR ME PJESËMARRJE TË ULËT TË SHKOLLAVE

Në prag të festave të 28 dhe 29 Nëntorit, këngët partizane dhe patriotike u bënë pjesë e një aktiviteti artistik të organizuar nga Qendra Kulturore e Fëmijëve pranë Bashkisë Lushnjë.

Takimi i komplekseve artistike me temë “Këngë partizane dhe patriotike” mblodhi në skenë nxënës të disa shkollave 9-vjeçare të qytetit, të cilët përmes këngës sollën atmosferën dhe emocionet e festave të Nëntorit.

Por, përtej performancave artistike, ajo që ra në sy ishte pjesëmarrja tejet e ulët e shkollave.

Nga 26 shkolla 9-vjeçare që ka në juridiksion Bashkia Lushnjë, në këtë aktivitet u përfaqësuan vetëm pesë prej tyre: shkolla “Skënder Libohova”, “Kongresi”, “Gafurr Muço”, “Hysen Xheka” dhe një shkollë private e qytetit.

Mungesa e shkollave të njësive administrative ngre pikëpyetje mbi përfshirjen e tyre në aktivitetet kulturore dhe artistike që organizohen në data të rëndësishme kombëtare nga kjo qëndër .

Kjo është një situatë që kërkon reflektim nga drejtuesit e institucioneve përgjegjëse, veçanërisht nga Qendra Kulturore e Fëmijëve, për mënyrën e informimit, komunikimit dhe angazhimit të të gjitha shkollave në aktivitete të tilla e cila po zbehe pjesmarrjet në aktivitete të rëndësishme që zhvillohen nga kjo qëndër kultorore e fëmijëve .

Pavarësisht pjesëmarrjes së kufizuar, shkollat e pranishme ishin përgatitur denjësisht. Nën drejtimin e mësuesve të muzikës, nxënësit interpretuan disa këngë patriotike, duke dëshmuar përkushtim dhe talent artistik.

Një nga momentet më të veçanta ishte interpretimi i vogëlushes Alis Rexhepi, e cila solli me zërin e saj një këngë të repertorit të këngëtares së madhe lushnjare Vaçe Zela.

Aktiviteti vijoi nën ritmin e këngëve patriotike, duke përcjellë emocionet dhe ngjyrat e festave të Nëntorit.

Megjithatë, përtej suksesit të nxënësve pjesëmarrës, mbetet një pyetje që kërkon përgjigje: pse në një aktivitet që synon të përfshijë fëmijët e gjithë bashkisë, pjesa më e madhe e shkollave mbetet jashtë tij?

Një çështje që meriton vëmendjen e institucioneve dhe një angazhim më të madh për aktivitetet e ardhshme kulturore në Lushnjë.

Bizneset që reklamohen në rrjetin e TV Apollon

Bëj edhe ti publicitet në TV Apollon

Tel: +355 69 27 56 610

Tel: +355 69 51 27 033