Në një seancë të tensionuar të Komisionit Hetimor për Sterilizimin, ish-ministri Ilir Beqaj, u paraqit për të dhënë dëshmi, dhe përplasjet mes anëtarëve të komisionit arritën kulmin.
Dialogu i ngarkuar emocionalisht u përshkallëzua kur kryetarja e komisionit, Albana Vokshi, dhe deputetët socialistë filluan replika të ashpra, duke përfshirë edhe deputetin Plarent Ndreca, i cili e quajti Vokshin “bolshevike,” ndërkohë që kjo e fundit iu përgjigj me fjalë të forta dhe ironike.
Dialogu mes anëtarëve të komisionit përfshinte replikat e mëposhtme:
Beqaj: “Jam akuzuar si hajdut nga ju. Nuk jam i shkreti. Boll me epitete ndaj meje. Ta kam thënë në 2016 hallin tënd s’ta zgjidh unë.”
Vokshi, e cila i drejtohej herë pas here Beqajt me fjalët “i shkreti,” replikoi: “Hallet e mia unë i zgjidh vetë. Hallet e tua nuk di si t’i zgjidh.”
Debati vazhdoi me tension të lartë:
Beqaj: “Unë dua të informoj njerëzit se çfarë ka ndodhur. Nuk ka përkufizim ligjor kush është forma e deklaratës.”
Kjo u refuzua nga Vokshi, e cila tha: “Po kërkoni t’i jepni të drejta më shumë se dëshmitarëve të tjerë. Ligji përcakton vetëm deklaratën, nëse nuk dëshironi, fillojmë me pyetje.”
Socialistët kundërshtuan, duke pretenduar se një deklaratë e tillë është e pranueshme edhe në gjykatë dhe duhet të lejohej.
Vokshi ironizoi: “E kuptoj sikletin. Nuk e shpëtoni dot. Doni të bëni konferencë shkencore.”
Në përgjigje, deputeti socialist Plarent Ndreca e quajti komisionin “akuzator” dhe retorikën e Vokshit “helmues.”
Në një moment të acaruar, u shfaqën replika të tjera:
Ndreca: “Ti je një bolshevike! Nuk më intimidon dot!”
Vokshi iu përgjigj: “Ke dalë jashtë kontrollit. Nuk e shpëton dot veten me këto intimidime.”
Ndreca vazhdoi: “Ti nuk ke të drejtë morale të flasësh për askënd. Po e ke kthyer këtë komision në një ‘baltë.’ Nuk ke argument dhe përdor intimidim për të hequr të drejtat e anëtarëve të Kuvendit.”
Vokshi e sfidoi: “Ti nuk duhet të ishe fare këtu, je në akuzë për vjedhje.”
Ndreca iu përgjigj: “Nëse je e zonja, hajde shihemi në gjykatë. Nuk më intimidon dot!”
Në përpjekje për të vazhduar deklaratën, Beqaj kërkoi leje për ta bërë atë me ilustrime përmes “PowerPoint,” që Vokshi refuzoi duke theksuar se ligji nuk e lejonte.
Beqaj këmbënguli: “Ligji më njeh të drejtën për një deklaratë të kontekstualizuar. Dua ta ilustroj me mjete. Ju nuk e dini çfarë kam bërë pa e parë.”
Vokshi këmbënguli: “Do bëni deklaratën apo do filloj me pyetje?”
Debati përfundoi pa një zgjidhje konkrete, me Beqajn dhe socialistët që kërkonin të vazhdonin deklaratat e tyre, ndërsa Vokshi përmbante procedurat strikte të komisionit, duke refuzuar çdo ndryshim në formatin e deklaratës.
