Në Tiranë po ngrihen kulla deri në 67 kate, ndërsa bregdeti shqiptar po mbushet me ndërtime mbi 20 kate, një valë e re betoni që po ndryshon fytyrën e vendit.
Në tre mbledhjet e fundit të Këshillit Kombëtar të Territorit dhe Ujit, janë miratuar 16 leje të reja ndërtimi që po ndezin debat mbi drejtimin urbanistik të Shqipërisë. Nga Tirana deri në Qerret, Vlorë e Shëngjin, kullat po shndërrohen në simbol të zhvillimit të vrullshëm, por edhe të mungesës së balancës mes qytetit dhe natyrës.
Në kryeqytet, projekti më i madh është ai i kompanisë “Klar”, e cila ka marrë miratim për një kompleks gjigant kullash në zonën e Bulevardit të Ri. Ndërtesat e saj do të variojnë nga 33 deri në 67 kate mbi tokë, me gjashtë kate nëntokë. Ky është ndërtimi më i lartë i miratuar ndonjëherë në Tiranë, transmeton Boldnews.
Në zonën e “Ali Demit”, janë aprovuar dy ndërtesa të tjera mbi 30 kate nga kompania “El & El Construction”, ndërsa rruga “Viktor Eftimiu” do të presë një tjetër objekt të madh banimi dhe shërbimesh me deri në 25 kate, nën zhvillimin e “Trust Construction”.
Në listën e projekteve të miratuara përfshihet edhe “One Boulevard Tower”, e kompanisë “G&E Investment”, si dhe “Kedinvest”, që do të ndërtojë një kompleks me ndërtesa të lartësive të ndryshme, nga 4 deri në 25 kate. Tirana po përjeton një bum vertikal ndërtimesh që po ndryshon përfundimisht horizontin e saj.
Por ndërsa kryeqyteti ngrihet drejt qiellit, edhe bregdeti nuk mbetet pas. Në Vlorë, kompania “Materia Cons 01” ka marrë leje për ndërtimin e “Vlora Beach Tower”, një objekt shumëkatësh me funksion hotelier. Ndërkohë, “Stroytech” do të ndërtojë “I Love Vlore Tower” në Bulevardin “Ismail Qemali”, duke i dhënë qytetit një tjetër siluetë vertikale.
Në Qerret të Kavajës, “Grand Brillant” ka fituar dy leje ndërtimi të mëdha për hotele dhe aparthotele shumëkatëshe. Projekti “Narea Hotel dhe Aparthotel” parashikon një ndërtesë 16-katëshe, ndërsa “Pines for Qerret Hotel & Apart Hotel” do të ketë kulla deri në 18 kate mbi tokë.
Valën e betonit e ka përfshirë edhe veriun e vendit. Në Shkodër, kompania “Euro Sistem” do të ndërtojë një kompleks hotelerie me 24 kate në Pulaj-Plazh, ndërsa në Lezhë, “S.T. Konstruksion” ka marrë leje për një rezidencë turistike dhe hotel me lartësi 26 kate.
Në të njëjtin qytet, “Alessio Konstruksion” po përgatitet të ndërtojë strukturën “Gjirafa”, një objekt 29-katësh me kombinim funksionesh hotelerie dhe banimi. Këto projekte pritet të transformojnë bregdetin verior, i cili deri më sot njihej për ndërtimet e ulëta dhe hapësirat natyrore.
Lista e lejeve të miratuara tregon një përqendrim të dukshëm të projekteve në duart e pak kompanive, që dominojnë sektorin e ndërtimit në Shqipëri. “Klar”, “Trust Construction”, “Stroytech” dhe “Grand Brillant” janë ndër emrat që përsëriten më shpesh në dokumentet zyrtare të KKTU-së.
Këto vendime janë miratuar në mbledhjet e datave 16 korrik, 23 korrik dhe 29 shtator, duke sinjalizuar një ritëm të pandalshëm lejesh ndërtimi. Përkrah kullave në Tiranë, edhe projektet buzë detit po marrin përmasa të mëdha, duke rritur frikën për mbingarkesë mjedisore dhe humbje të hapësirave publike.
Ekspertët urbanë paralajmërojnë se mungesa e planifikimit afatgjatë mund të shndërrojë qytetet bregdetare në zona të mbingarkuara me beton dhe turizëm sezonal, duke dëmtuar qëndrueshmërinë ekonomike dhe ekologjike.
Ndërsa për ndërtuesit, kjo periudhë përfaqëson një “epokë të artë” për investime. Çmimet e apartamenteve dhe hapësirave komerciale në këto kulla pritet të jenë ndër më të lartat në treg, veçanërisht në Tiranë dhe Vlorë, ku kërkesa po mbetet e qëndrueshme.
Për momentin, asnjë nga këto projekte nuk është shoqëruar me transparencë të plotë për ndikimin mjedisor apo planin e integrimit urban. Megjithatë, një gjë është e qartë: Shqipëria po shkon drejt një realiteti të ri arkitektonik, ku qielli i saj do të dominohet nga kulla gjigante dhe jo nga horizontet e natyrës që dikur e dallonin.
