Kremlini ka reaguar me forcë ndaj deklaratave të kryeministrit britanik Keir Starmer, i cili ka njoftuar planet për të dërguar trupat britanikë në Ukrainë si pjesë e një misioni të mundshëm paqeruajtës.
Zëdhënësi i Kremlinit, Dmitry Peskov, tha se një plan i tillë do të ishte “i papranueshëm” dhe se Rusia po monitoron situatën me shumë shqetësim. Për Kremlinin, çdo prani e trupave të shteteve anëtare të NATO-s në Ukrainë është një kërcënim për sigurinë e vetë Rusisë.
Starmer ka deklaruar se është “i gatshëm” të dërgojë trupat britanikë në Ukrainë si një garanci sigurie në rast të një armëpushimi mes Moskës dhe Kievit. Kryeministri britanik ka bërë të ditur se do të paraqesë një plan për dërgimin e më pak se 30,000 trupave evropianë në Ukrainë, duke kërkuar në këmbim mbrojtjen e trupave nga Shtetet e Bashkuara.
Rusia e ka konsideruar këtë nismë si një veprim të rrezikshëm, duke theksuar se prania e trupave nga një shtet anëtar i NATO-s në Ukrainë do të përbënte një kërcënim të drejtpërdrejtë për sovranitetin e saj. Ministri i Jashtëm i Rusisë, Sergei Lavrov, ka pohuar këtë javë se Moska do ta shikonte një veprim të tillë si një shkelje të sigurisë kombëtare, pavarësisht se forcat do të vepronin nën një flamur të ndryshem.
Peskov ka shtuar se çdo propozim për të dërguar trupa të NATO-s në Ukrainë do të kishte pasoja të rënda për Rusinë. Ai ka theksuar se një hap i tillë do të kishte një kuptim tërësisht të ndryshëm nga pikëpamja e sigurisë ruse, duke e bërë atë një shqetësim të madh për Kremlinin. “Ne po e monitorojmë këtë nga afër,” tha Peskov gjatë një konference të zakonshme për media.
Kremlini ka ripërsëritur qëndrimin e tij të mëparshëm se prania e trupave të NATO-s në Ukrainë është e papranueshme dhe e rrezikshme. Gjatë një bisede të zhvilluar në Riad të martën, Rusia ka kërkuar që NATO të anulojë premtimin e vitit 2008 për t’i ofruar Ukrainës mundësinë e anëtarësimit në aleancën ushtarake të udhëhequr nga SHBA. Rusia ka hodhur poshtë gjithashtu idenë se trupat e NATO-s mund të vepronin si ruajtës të paqes, duke theksuar se një marrëveshje armëpushimi nuk mund të mbështetet në praninë e forcave të huaja.
Në këtë kontekst, tensionet mes Rusisë dhe Perëndimit vazhdojnë të rriten, ndërsa plani i Starmer për të dërguar trupa në Ukrainë duket të jetë një hap që mund të përshkallëzojë edhe më tej përplasjen mes këtyre dy botëve të ndryshme politike dhe ushtarake.
