Kuvendi i Kosovës do të përpiqet sërish të dielën për konstituimin e legjislaturës së re, pas 20 përpjekjeve të dështuara deri më tani, ndërsa seanca e radhës është parashikuar të nisë në orën 11:00, me partitë që vazhdojnë të mbeten të ndara për çështjen e kryeparlamentarit.
Kjo e diel shënon tentativën e 21-të për konstituimin e legjislaturës së nëntë të Kuvendit të Kosovës, pas zgjedhjeve të 9 shkurtit. Pas një serie dështimesh të njëpasnjëshme, partitë parlamentare do të ulen sërish në tryezë, me shpresën për të arritur më në fund një marrëveshje që do t’i japë vendit një parlament funksional.
Mbledhja e fundit, e mbajtur më 23 maj, dështoi për të 12-ën herë në krijimin e një komisioni të posaçëm që do të mbikëqyrte procesin e votimit të fshehtë për zgjedhjen e kryetarit të Kuvendit. Kjo procedurë, e propozuar nga kryesuesi Avni Dehari më 1 maj, është tashmë objekt shqyrtimi në Gjykatën Kushtetuese të Kosovës, pas ankesave të ngritura nga partitë që ishin në opozitë në legjislaturën e kaluar.
Lëvizja Vetëvendosje, e cila doli fituese në zgjedhjet e fundit, vazhdon të këmbëngulë në kandidaturën e Albulena Haxhiut për postin e kryeparlamentares. Megjithatë, partitë e tjera politike kanë refuzuar të mbështesin këtë propozim, duke kërkuar që Vetëvendosje të propozojë një kandidat konsensual për të çuar përpara procesin e konstituimit.
Pas seancës së fundit, përfaqësues të partive parlamentare theksuan se qëndrimet e tyre mbeten të pandryshuara, duke mos lënë hapësirë për kompromis të shpejtë. Nga ana tjetër, deputetja e Vetëvendosjes, Donika Gërvalla, akuzoi deputetët e partive të tjera për bllokimin e punës së Kuvendit, ndërsa u bëri thirrje të reflektojnë dhe të votojnë për zhbllokimin e procesit në seancën e ardhshme.
Nënkryetarja e Partisë Demokratike të Kosovës, Vlora Çitaku, deklaroi se Kosova po mbahet peng nga qëndrimi i kryetarit të Vetëvendosjes, Albin Kurti. Ajo theksoi se partia që përfaqëson është e gatshme të ofrojë alternativa për të hapur rrugën drejt zgjidhjes së ngërçit politik, duke theksuar nevojën për më shumë fleksibilitet nga të gjithë aktorët.
Megjithë thirrjet për kompromis, situata në Kuvendin e Kosovës mbetet e tensionuar dhe me shumë të panjohura. Vëmendja është përqendruar te seanca e radhës, ku pritet të shihet nëse partitë do të arrijnë të gjejnë gjuhën e përbashkët për t’i dhënë fund bllokadës shumëjavore në organin më të lartë legjislativ të vendit.
