Katari ka pezulluar rolin e tij si ndërmjetës në bisedimet për armëpushim dhe lirimin e pengjeve midis Izraelit dhe Hamasit.
Ky veprim vjen pas deklaratave të disa zyrtarëve të lartë amerikanë, të cilët shprehën se Uashingtoni nuk do të pranonte më praninë e përfaqësuesve të Hamasit në Katar, duke e akuzuar këtë grup për refuzimin e propozimeve të reja për të përfunduar konfliktin në Gaza.
Një burim diplomatik sqaroi se zyra politike e Hamasit në Doha nuk po arrinte më qëllimin e saj, për shkak të një refuzimi për të negociuar me mirëbesim. Megjithatë, Katari mbetet i gatshëm të rifillojë ndërmjetësimin nëse Izraeli dhe Hamasi tregojnë sinqeritet për t’u kthyer në tryezën e bisedimeve. Kjo bazë e Hamasit në Katar ka ekzistuar që prej vitit 2012, me mbështetjen fillestare të administratës Obama.
Zyrtarët amerikanë, në njoftime anonime për Reuters, përmendën se qeveria e Katarit kishte rënë dakord t’i kërkonte Hamasit të mbyllte zyrën e tij politike dhjetë ditë më parë. Nga ana tjetër, zyrtarët e Hamasit mohuan këto raportime. Katari, pavarësisht se është një shtet i vogël, ka luajtur një rol kyç si aleat i SHBA-së në rajon, duke pritur një bazë të madhe ajrore amerikane dhe duke ndërmjetësuar në negociata të ndjeshme politike me vende si Irani dhe Rusia.
Së bashku me SHBA-në dhe Egjiptin, Katari ka marrë pjesë në përpjekje për të ndërmjetësuar një armëpushim në konfliktin midis Izraelit dhe Hamasit. Megjithatë, marrëdhëniet e Katarit me Hamasin kanë nisur të ndryshojnë. Pas vrasjes së liderit të Hamasit, Yahya Sinuar, Hamasi mbajti një ceremoni zie në Doha, por në një format më të reduktuar sesa ceremoni të ngjashme në të kaluarën.
Dështimi i fundit në bisedimet e tetorit për të arritur një marrëveshje për armëpushim afatshkurtër ka lënë palët të pakënaqura. Hamasi vazhdon të kërkojë përfundimin e plotë të konfliktit dhe tërheqjen e trupave izraelite nga Gaza, ndërsa Izraeli është akuzuar për refuzimin e marrëveshjeve. Ish-ministri izraelit i Mbrojtjes, Yoav Gallant, pas largimit të tij, akuzoi kryeministrin Netanyahu se nuk pranoi një marrëveshje paqeje kundër këshillës së shefave të sigurisë.
Kërkesa për të larguar Hamasin nga Katari duket të jetë një përpjekje e administratës së Bidenit për të detyruar një marrëveshje paqeje përpara përfundimit të mandatit të tij. Megjithatë, mbetet e paqartë se ku Hamasi do ta zhvendoste zyrën e tij politike nëse largohet nga Doha.
Irani, aleat kryesor i Hamasit, mund të jetë një opsion për zhvendosjen, por ngjarjet e kaluara, si vrasja e Ismail Haniyeh në Teheran, sugjerojnë se ata mund të jenë në rrezik nga sulmet izraelite nëse vendosen atje. Po ashtu, kjo do të kufizonte mundësinë e tyre për kontakte diplomatike me Perëndimin.
