Ministri izraelit i Mbrojtjes, Israel Katz, ka paralajmëruar një rikthim të luftës në Gaza me një intensitet të ri, nëse Hamasi nuk liron pengjet izraelitë deri të shtunën.
Duke folur pas një takimi me zyrtarë të lartë ushtarakë, Katz deklaroi se “nëse Hamasi nuk i liron pengjet, do të hapen dyert e ferrit, ashtu siç ka paralajmëruar edhe presidenti amerikan”.
Ai theksoi se nëse lufta rinis, Izraeli do të zbatojë një strategji të ndryshme nga ajo e fazës së parë të konfliktit dhe se ofensiva e re do të ketë objektiva të qarta për të ndëshkuar grupin militant.
Katz la të kuptohet gjithashtu se veprimet e ardhshme ushtarake do të përputhen me planin e presidentit amerikan Donald Trump për rajonin, duke lënë të hapur mundësinë e një konfigurimi të ri për Gazën pas përfundimit të konfliktit.
Ndërkohë, tensionet mbeten të larta, me komunitetin ndërkombëtar që vijon përpjekjet për të ndërmjetësuar një marrëveshje për lirimin e pengjeve dhe shmangien e një përshkallëzimi të mëtejshëm.
Lufta mes Izraelit dhe Hamasit ka shkaktuar deri tani mijëra viktima dhe ka rënduar krizën humanitare në Rripin e Gazës, ndërsa çdo zhvillim i ri në bisedimet për pengjet mund të jetë vendimtar për vijimin ose ndërprerjen e konfliktit.
