Sulmi me raketa në qytetin iranian Astaneh Ashrafiyeh shkaktoi nëntë të vrarë dhe dhjetëra të plagosur, pak para shpalljes së armëpushimit.
Pak orë para shpalljes zyrtare të armëpushimit, një sulm ajror i forcave izraelite ka goditur qytetin Astaneh Ashrafiyeh në veri të Iranit, duke shkaktuar dëme të mëdha dhe viktima të shumta. Pamjet e siguruara nga BBC zbulojnë shkatërrimin e plotë të një ndërtese banimi, ku dyshohet se ndodhej një figurë e lartë shkencore.
Mediat iraniane raportuan se në këtë sulm humbi jetën shkencëtari bërthamor Mohammadreza Sedighi, një emër i njohur në qarqet shkencore iraniane. Vdekja e tij pritet të ngrejë më tej tensionet mes Teheranit dhe Tel Avivit, në një moment kur pritej përshkallëzimi të zbutet.
Zëvendësguvernatori i provincës Gilan konfirmoi për mediat se katër banesa u shkatërruan plotësisht, ndërsa shumë të tjera pësuan dëme nga shpërthimi. Ai shtoi se dëmet materiale janë të konsiderueshme, ndërsa komuniteti lokal është i tronditur.
Sipas autoriteteve iraniane, sulmi la pas nëntë të vdekur dhe 33 të plagosur, përfshirë gra dhe fëmijë. Ekipet e emergjencës u angazhuan menjëherë në kërkim-shpëtim, ndërkohë që zona u rrethua për të shmangur incidente të tjera.
Ky akt ushtarak ndodhi vetëm pak orë përpara njoftimit për armëpushim të shpallur nga SHBA, duke rrezikuar çdo përpjekje për qetësim të situatës në rajon. Teherani ka akuzuar drejtpërdrejt Izraelin për këtë agresion, duke e cilësuar një provokim të qëllimshëm dhe një shkelje të rëndë të së drejtës ndërkombëtare.
Zyrtarët iranianë kanë paralajmëruar se do të ketë përgjigje të ashpër ndaj këtij sulmi, ndërsa analistët ndërkombëtarë e shohin situatën si veçanërisht të paqëndrueshme. Sulmi ka shtuar frikën për përshkallëzim të mëtejshëm ushtarak në një rajon tashmë të tensionuar.
