Një incident dhune është shënuar mesditën e 4 shkurtit në lagjen “Kushtrimi” në Vlorë, gjatë një proteste të zhvilluar nga punonjësit e Ndërmarrjes së Gjelbërimit të Bashkisë. Ngjarja ka ndodhur në prani të qytetarëve dhe përfaqësuesve të mediave që po pasqyronin protestën.

Sipas të dhënave zyrtare, një 33-vjeçar, banues në Vlorë, dyshohet se ka qenë në gjendje të dehur dhe ka nisur fillimisht një debat verbal me një gazetar 33-vjeçar, i cili ndodhej në vendngjarje për të kryer detyrën e tij profesionale. Debati ka degraduar më pas në përplasje fizike, ku gazetari është goditur me grusht.

I njëjti person dyshohet se ka ushtruar dhunë edhe ndaj një 67-vjeçari, duke i shkaktuar dëmtime të lehta trupore. Të dy të dëmtuarit kanë marrë ndihmën e nevojshme, ndërsa gjendja e tyre shëndetësore nuk paraqitet shqetësuese.

Autori i dyshuar është shoqëruar në Komisariatin e Policisë Vlorë, ku pas kryerjes së veprimeve të para hetimore dhe komunikimit me prokurorin e gatshëm, është proceduar penalisht në gjendje të lirë.

Materialet procedurale janë referuar në Prokurorinë pranë Gjykatës së Shkallës së Parë Vlorë, për veprat penale “Goditja për shkak të detyrës” dhe “Dëmtime të tjera me dashje”.

Ngjarja ka rikthyer vëmendjen mbi sigurinë e gazetarëve gjatë ushtrimit të detyrës, veçanërisht në situata tensioni social dhe protesta publike.