Kitaristi dhe një nga anëtarët themelues të grupit legjendar Grateful Dead, Bob Weir, ka ndërruar jetë në moshën 78-vjeçare. Lajmi u bë i ditur nga familja e tij, e cila njoftoi se artisti u largua nga jeta i rrethuar nga njerëzit e dashur.

Në deklaratë thuhet se Weir u përball me kancerin me guxim, duke arritur ta mposhtë atë, por më pas u dorëzua për shkak të problemeve me mushkëritë. Familja e përshkroi ndarjen e tij nga jeta si të qetë dhe në paqe.

Bob Weir përkujtohet si kitarist, vokalist, tregimtar dhe figurë themelore e Grateful Dead, një grup që la gjurmë të thella në historinë e muzikës amerikane. Sipas deklaratës, arti i tij nuk ishte vetëm muzikë, por një forcë që krijoi komunitet, identitet dhe ndjenjë përkatësie për breza të tërë fansash.

Vepra e Weir-it, theksohet më tej, shkoi përtej skenave dhe sallave të koncerteve, duke ndikuar në mënyrën se si muzika u përjetua si lidhje njerëzore dhe shpirtërore. Ai u konsiderua një figurë udhëzuese, arti i të cilit riformësoi kulturën muzikore amerikane.

Njoftimi bën të ditur se diagnoza e kancerit ishte vendosur në muajin korrik dhe se trajtimi kishte nisur vetëm pak javë përpara se Weir të rikthehej në skenë në qytetin e tij të lindjes, për tri net koncerte me muzikë të viteve ’60 në Golden Gate Park. Edhe në atë moment, ai zgjodhi të vijonte rrugën e tij artistike sipas mënyrës që e karakterizonte.

Deklarata mbyllet me shpresën se trashëgimia e Bob Weir-it do të jetojë përmes brezave të ardhshëm të fansave, duke ruajtur frymën dhe ndikimin e tij në historinë e muzikës.