Përfundon ngërçi politik, Friedrich Merz mund të bëhet kancelari i ri i Gjermanisë, duke marrë drejtimin e qeverisë pas betimit sot.
Në një ditë historike për politikën gjermane, pas gjashtë muajsh ngërçi, Bundestagu do të mblidhet sot për të zgjedhur kancelarin e ri të vendit. Sipas planit, Friedrich Merz do të marrë miratimin për të udhëhequr qeverinë e re, duke shënuar fillimin e një koalicioni të ri midis CDU-së dhe socialdemokratëve (SPD). Ky është koalicioni i pestë i Unionit konservator dhe SPD, i njohur si koalicioni “zi-kuq”.
Në orën 09:00, Bundestagu do të mblidhet për zgjedhjen e kancelarit. Seanca do të hapet nga presidentja e Bundestagut, Julia Klöckner, e cila nuk do të mbajë fjalim. Merz ka nevojë për 316 vota për të siguruar emërimin si kancelar, dhe është i sigurt se do t’i marrë këto vota, duke qenë se në Bundestag janë 328 deputetë nga CDU/CSU dhe SPD.
Pas miratimit në Bundestag, kancelari i zgjedhur do të emërohet formalisht nga presidenti Frank-Walter Steinmeier në orën 10:30. Pas këtij emërimi, Merz do të kthehet në Bundestag për të bërë betimin zyrtar në orën 12:00. Ky betim do të përfshijë një deklaratë solemne, në të cilën Merz do të premtojë t’i shërbejë mirëqenies së popullit gjerman dhe të respektojë Kushtetutën e vendit.
Në pasditen e së njëjtës ditë, kabineti i ri do të emërohet dhe ministrat do të marrin certifikatat e tyre të emërimit nga presidenti Steinmeier. Ky moment do të pasohet nga një fjalim i presidentit, ku do të përmenden detyrat e qeverisë së re dhe pritshmëritë ndaj saj. Pas kësaj, ministrat do të bëjnë betimin e tyre në Bundestag.
Në orën 15:00, kancelari aktual Olaf Scholz do t’i dorëzojë detyrën pasuesit të tij, Friedrich Merz, në zyrën e kancelarit. Pas kësaj, ministrat do të dorëzojnë edhe ata detyrat e tyre në kabinetin e ri.
Nëse gjithçka shkon sipas planit, të mërkurën Merz do të nisë ditën e tij të parë si kancelar i ri me një vizitë në Francë dhe Poloni. Johann Wadephul, ministri i Jashtëm i ri, pritet ta shoqërojë atë në këto vizita. Më pas, të premten, Merz planifikon të udhëtojë në Bruksel për të takuar presidenten e Komisionit të BE-së, Ursula von der Leyen, dhe sekretarin e Përgjithshëm të NATO-s, Mark Rutte.
