Presidenti turk, Recep Tayyip Erdogan, ka ftuar Donald Trumpin të vizitojë Turqinë, duke diskutuar çështje të rëndësishme ndërkombëtare dhe lidhjet mes dy vendeve.
Në një telefonatë të zhvilluar të hënën, presidenti i Turqisë, Recep Tayyip Erdogan, dhe homologu i tij amerikan, Donald Trump, biseduan për çështje rajonale dhe globale, duke u përqëndruar veçanërisht në marrëdhëniet dypalëshe mes dy vendeve. Erdogan e ftoi Trumpin të vizitojë Turqinë për të forcuar më tej bashkëpunimin mes dy shteteve, veçanërisht në fushën e industrisë së mbrojtjes.
Në këtë bisedë telefonike, Erdogan theksoi se Turqia do të vazhdojë të ndërmarrë hapa për të avancuar marrëdhëniet me Uashingtonin. Ai shprehu gjithashtu shqetësimin për krizën humanitare në Gaza, e cila ka arritur në një “nivel të rëndë” dhe theksoi gatishmërinë e Turqisë për të ofruar ndihmë dhe për të kontribuar në krijimin e një paqeje të qëndrueshme në rajon.
Erdogan gjithashtu vlerësoi përpjekjet e Trump për të ndalur luftërat, duke theksuar angazhimin e Turqisë për të mbështetur përpjekjet për arritjen e një marrëveshjeje paqësore mes palëve në luftën e Rusisë dhe Ukrainës, si dhe përpjekjet për të zgjidhur krizën në Iran. Ai theksoi se përpjekjet e SHBA-së për të lehtësuar sanksionet ndaj Sirisë janë të rëndësishme për ruajtjen e stabilitetit në këtë vend dhe për forcimin e paqes në rajon.
Më tej, presidenti turk nënvizoi rëndësinë e ruajtjes së integritetit territorial të Sirisë dhe sigurisë në këtë shtet. Erdogan shprehu mbështetje për çdo iniciativë që kontribuon në stabilizimin e Sirisë dhe përfundimin e luftës, duke theksuar se një Siri e qëndrueshme është një element kyç për paqen rajonale dhe globale. Ai kërkoi që të vazhdojnë përpjekjet për lehtësimin e kushteve të jetesës dhe për stabilizimin e situatës në rajon.
Në përfundim, Erdogan i kërkoi Trumpit që të intensifikojnë bashkëpunimin dhe të mbështesin përpjekjet e përbashkëta për të arritur një stabilitet të qëndrueshëm në Lindjen e Mesme dhe më gjerë, duke theksuar se një partneritet i ngushtë midis Turqisë dhe SHBA-së është thelbësor për përballimin e krizave dhe sfidave globale.
