Fluturimet direkte mes Shqipërisë dhe Izraelit janë tani realitet, një zhvillim që pritet të sjellë një epokë të re mundësish për të dy vendet.
Kryeministri Edi Rama e bëri publik këtë lajm përmes një postimi në X, ku e cilësoi si një hap fantastik për forcimin e lidhjeve dypalëshe.
“Ky është një lajm fantastik për forcimin e lidhjeve mes Izraelit dhe Shqipërisë! Fluturimet direkte jo vetëm që thjeshtojnë udhëtimet, por krijojnë mundësi të reja për shkëmbime kulturore, turizëm dhe bashkëpunim ekonomik,” shkroi Rama.
Kryeministri theksoi se lidhja historike mes dy vendeve, përfshirë rolin e Shqipërisë në shpëtimin e hebrenjve gjatë Luftës së Dytë Botërore, mbetet një bazament i fuqishëm për një miqësi më të qëndrueshme dhe një partneritet të frytshëm në të ardhmen.
Fluturimet direkte do të nxisin më shumë vizitorë izraelitë për të eksploruar peizazhet natyrore të Shqipërisë, kulturën e pasur dhe ekonominë në rritje. Rama e vuri theksin te rëndësia e këtij hapi për promovimin e turizmit dhe për të sjellë përfitime reciproke për të dyja vendet.
“Një e ardhme bashkëpunimi dhe respekti të ndërsjellë mund të krijojë mundësi të jashtëzakonshme,” u shpreh ai, duke e konsideruar këtë zhvillim si një kapitull të ri që do të forcojë miqësinë e gjatë mes dy vendeve.
Në postimin e tij, Rama shprehu mirënjohje të veçantë për presidentin izraelit Isaac Herzog, duke e cilësuar si një mik të çmuar dhe një lider frymëzues. Ai falënderoi Herzog për angazhimin e tij në sjelljen e një delegacioni sipërmarrësish izraelitë në Shqipëri dhe për nxitjen e biznesmenëve hebrenj që ta konsiderojnë vendin tonë një destinacion të shkëlqyer për investime.
Ky hap do të jetë një shtysë e fortë për të rritur lidhjet tregtare dhe për të krijuar partneritete të reja ekonomike mes komunitetit të biznesit në të dyja shtetet.
Fluturimet direkte pritet të përmirësojnë ndjeshëm lidhjet e transportit, duke reduktuar kohën e udhëtimit dhe duke i bërë destinacionet më të arritshme për turistët dhe sipërmarrësit.
Lidhjet më të forta ajrore përforcojnë jo vetëm marrëdhëniet ekonomike dhe kulturore, por edhe ndjenjën e miqësisë që Shqipëria dhe Izraeli kanë ndërtuar prej dekadash mbi bazën e historisë dhe solidaritetit të përbashkët.
