Divjaka vijon të mbetet një nga zonat e rëndësishme të prodhimit bujqësor në vend. Me përkushtimin e përditshëm të fermerëve dhe tokat pjellore, kjo zonë sjell çdo vit në treg prodhime të ndryshme perimore, duke furnizuar si tregun vendas, ashtu edhe atë të huaj.

Këto ditë, me ardhjen e vjeshtës dhe afrimin e dimrit, në treg kanë dalë prodhimet e lakrës së bardhë, lakrës së gjelbër dhe brokolit, kultura që zënë një vend të rëndësishëm në ekonominë bujqësore të zonës.

Pamjet që sjellim vijnë nga parcelat e fermerëve në fshatin Mizë, në Bashkinë Divjakë, ku puna në tokë vijon çdo ditë për të siguruar prodhime të freskëta dhe cilësore.

Falë kushteve të favorshme të tokës dhe përvojës së fermerëve, këto kultura ofrojnë jo vetëm mundësi për konsumatorët vendas, por edhe furnizim për pikat e grumbullimit, të cilat i tregtojnë prodhimet përtej kufijve të Shqipërisë.

Për fermerët e Divjakës, kjo periudhë shënon një tjetër fazë të rëndësishme të vitit bujqësor, ku puna dhe prodhimi synojnë të përkthehen në të ardhura për familjet e tyre.

Divjaka, edhe këtë sezon, dëshmon potencialin e saj bujqësor, duke e kthyer tokën pjellore në prodhim dhe prodhimin në një mundësi për tregun vendas dhe eksportin.