Në mesin e sezonit turistik, plazhi i Divjakës vijon të jetë një nga destinacionet më të frekuentuara të bregdetit shqiptar. Temperaturat e larta të kësaj fundjave kanë sjellë qindra pushues vendas e të huaj, të cilët kanë zgjedhur bregun e Divjakës për të kaluar ditët e nxehta të verës.

Ajri i pastër, hapësira e gjerë me rërë dhe deti i pastër mbeten arsyet kryesore që tërheqin çdo ditë familje, të rinj dhe vizitorë nga zona të ndryshme të vendit. Nën çadrat shumëngjyrëshe, pushuesit shijojnë diellin, ndërsa fëmijët luajnë me dallgët e vogla të detit, duke krijuar atmosferën karakteristike të verës.

Edhe bizneset përgjatë vijës bregdetare po përjetojnë një sezon të ngarkuar. Restorantet pranë detit, mirëpresin çdo ditë dhjetëra pushues me gatime tradicionale dhe specialitete të zonës, ku peshku i freskët i Lagunës së Karavastasë mbetet ndër ushqimet më të kërkuara në tryezat e vizitorëve.

Ndërkohë, përgjatë plazhit nuk mungojnë as tregtarët ambulantë, të cilët ofrojnë misër të pjekur, fruta të freskëta dhe produkte të tjera verore. Shëtitjet buzë detit, freskia e pishave dhe zhurma e dallgëve krijojnë një atmosferë relaksuese, ndërsa fëmijët argëtohen me valët e vogla dhe rërën.

Me natyrën e paprekur, peizazhin unik dhe mikpritjen e bizneseve lokale, Divjaka vazhdon të mbetet një nga destinacionet më të preferuara për pushime familjare, duke mirëpritur çdo ditë një numër të lartë vizitorësh në kulmin e sezonit turistik.