NGA MUKADES DERVISHI
Në kuadër të Ditës Ndërkombëtare të Tokës, Bashkia Divjakë dhe Administrata e Zonave të Mbrojtura organizuan një aktivitet sensibilizues për mbrojtjen e mjedisit.
Në kuadër të Dites Ndërkombëtare të Tokës, administrata e zonave të mbrojtura Divjakë, në bashkëpunim me Bashkinë e Divjakës, realizuan një aktivitet simbolik në Parkun Kombëtar Divjakë Karavasta. Ky aktivitet kishte për qëllim sensibilizimin e qytetarëve dhe përçimin e mesazhit për ruajtjen e ambientit dhe pastrimin e hapësirave natyrore.
Punonjësit e administratës së zonave të mbrojtura, së bashku me punonjësit e ndërmarrjes së pastrimit të Bashkisë Divjakë, pastruan mbeturinat që ndodheshin në disa rrugë dhe shtigje të pyllit. Ky akt simbolik i pastrimit i dha një mesazh të fuqishëm, duke theksuar rëndësinë e mbajtjes së pastër të mjedisit dhe përpjekjet që duhet të bëjmë për ta ruajtur atë.
Në aktivitetin e organizuar mori pjesë edhe drejtori i administratës së zonave të mbrojtura të qarkut Fier, i cili erdhi në Divjakë për të përçuar mesazhin e rëndësishëm të mbrojtjes dhe ruajtjes së natyrës. Ai theksoi se një nga sfidat kryesore që vazhdon të mbetet për administratën dhe qytetarët është mbrojtja e pasurisë natyrore dhe shmangia e ndotjes që po dëmton ambientet natyrore, veçanërisht parkun kombëtar Divjakë-Karavasta.
Ky aktivitet i realizuar është një hap i rëndësishëm në drejtim të ndërgjegjësimit për rëndësinë e ruajtjes së natyrës dhe pastrimin e zonave të mbrojtura, të cilat janë vendbanim për shumë specie të florës dhe faunës. Megjithatë, pastrimi i pyjeve dhe hapësirave të tjera mbetet një nga problemet më të mëdha që kërkon angazhim të përhershëm dhe të vazhdueshëm nga të gjithë qytetarët.
Në këtë ditë, kur mbarë bota feston Ditën Ndërkombëtare të Tokës, aktivitetet e tilla janë të nevojshme për të ndihmuar në ruajtjen e trashëgimisë natyrore dhe për të garantuar një mjedis të shëndetshëm dhe të paster për brezat e ardhshëm. Pastrimi i mbeturinave dhe përpjekjet për ruajtjen e ambientit janë veprime të domosdoshme për të arritur qëllimin e mbrojtjes së mjedisit.
Ky aktivitet ishte një thirrje e drejtpërdrejtë për të gjithë banorët e Divjakës dhe vizitorët e parkut që të angazhohen aktivisht në ruajtjen e natyrës dhe mbajtjen e një mjedisi të pastër dhe të shëndetshëm.
