Skuadra mallakastriote përgatitet për sfidën e javës së dytë ndaj Flamurtarit, me dilema në sulm dhe pritshmëri për debutime të rëndësishme në formacion.
Në Ballsh, vëmendja është e përqendruar te ndeshja e fundjavës me Flamurtarin, që do të luhet në stadiumin “Adush Muça”. Edhe pse kalendari e kishte parashikuar sfidën në Vlorë, kushtet jo të plota të stadiumit “Flamurtari” kanë detyruar klubet të bien dakord për zhvillimin e takimit të parë në Mallakastër dhe atij të dytë në Vlorë.
Trajneri Mirel Josa duhet të përballet me mungesën e sulmuesit Mustafa, ndërsa po shqyrton alternativa për ta zëvendësuar. Një tjetër pikëpyetje është gjendja e brazilianit Indio Oliveira, i cili në sfidën ndaj Tiranës u aktivizua si zëvendësues, por u pa me probleme fizike.
Në pritje për debutim është edhe Karmona, një nga afrimet e verës, që po fiton formën e duhur dhe mund të jetë pjesë e skuadrës për këtë ndeshje ose për duelet pasuese. Nuk përjashtohet mundësia që Josa të surprizojë me debutime të tjera ose ndryshime taktike ndaj kuqezinjve vlonjatë.
Skuadra po qëndron e grumbulluar në kompleksin “Gjanica” për t’u përgatitur në mënyrë intensive. Kjo metodë, e zbatuar nga stafi teknik dhe presidenca, synon të rrisë harmoninë në grup dhe përshtatjen e lojtarëve të rinj. Në këtë fazë priten edhe dy afrime të tjera, çka e bën këtë strategji të nevojshme për javët e para të kampionatit.
Edhe merkatoja mbetet aktive për Bylisin. Janë 6-7 lojtarë që kanë tërhequr interes nga ekipe brenda dhe jashtë vendit, ndaj lëvizjet hyrëse dhe dalëse deri në fund të afatit veror janë të sigurta. Klubi ka transferuar mesfushorin Flamur Ruçi te Egnatia dhe ka investuar në përforcime me eksperiencë e talente të reja.
Megjithëse debutimi ndaj Tiranës nuk solli pikët e dëshiruara, loja e zhvilluar ka lënë shpresa. Mallakastriotët shfaqën dominim dhe krijuan raste të shumta, por u ndalën nga mungesa e finalizimit. Objektivi mbetet i qartë: të bëjnë një sezon të fortë si në kampionat, ashtu edhe në Kupën e Shqipërisë.
