Konferenca e fundvitit e kryeministrit Edi Rama u ndoq live nga ish-kryeministri Sali Berisha, i cili reagoi paralelisht me një konferencë për mediat, duke e akuzuar Ramën për gënjeshtra dhe manipulime ndaj pensionistëve.
Përmes Facebook-ut, Berisha vijoi akuzat e tij ndaj kryeministrit dhe SPAK, duke e cilësuar vitin që lamë pas si një “vit të burgosjeve politike”.
Në konferencën e tij, Berisha sulmoi qeverinë aktuale për trajtimin e pensionistëve. Ai deklaroi se në kohën e tij pensionet u dyfishuan dhe akuzoi Ramën për mashtrim dhe për zgjatjen e padrejtë të moshës së daljes në pension. “Rama ka kryer një krim masiv ndaj pensionistëve, duke i mashtruar për indeksimin dhe duke zgjatur moshën e pensionit pa asnjë arsye reale,” tha Berisha.
Për vizitën e planifikuar të Presidentit Donald Trump në Shqipëri në 2027, në kuadër të një samiti të NATO-s, Berisha deklaroi me siguri se do të jetë ai, dhe jo Rama, mikpritësi i këtij eventi. “Samitin do ta organizojë ai që anëtarësoi Shqipërinë në NATO dhe jo ai që protestoi kundër saj,” u shpreh ai, duke nënkuptuar një fitore të ardhshme elektorale për opozitën.
Berisha e quajti 2024-n “vitin e opozitës”, pavarësisht se një pjesë të madhe të vitit e kaloi në arrest shtëpie. Ai premtoi se beteja për një qeveri teknike do të vazhdojë në vitin 2025, duke theksuar rëndësinë e mosbindjes civile deri në zgjedhjet e ardhshme. “Mosbindja civile nuk do të ndalet deri ditën e zgjedhjeve,” deklaroi ai.
Ish-kryeministri projektoi një fitore të opozitës në zgjedhjet e ardhshme, duke pretenduar se mazhoranca aktuale po shkon drejt shpërbërjes. “Opozita po ecën drejt fitores, ndërsa kjo mazhorancë po shkërmoqet,” tha Berisha.
Megjithatë, fillimi i vitit 2025 pritet të sjellë një tjetër sfidë për Berishën, pasi Gjykata e Apelit do të shqyrtojë kërkesën e SPAK për rikthimin e tij në arrest shtëpie. Kjo çështje, sipas analistëve, mund të ndikojë ndjeshëm në dinamikën politike të vitit të ri.
Në përmbyllje të deklaratave të tij, Berisha nuk kurseu kritikat ndaj SPAK dhe drejtësisë, duke e quajtur institucionin “skrapin e partisë” dhe duke akuzuar kryeprokurorin Altin Dumani për veprime kriminale të ndikuara nga qeveria. “Kjo është një drejtësi e politizuar që ndihmon Ramën të mbajë PD-në nën presion,” tha ai.
Ndërkohë, retorika e Berishës dhe Rama mbetet një prej faktorëve kryesorë që po nxisin polarizimin politik dhe social në vend, ndërsa qytetarët përgatiten për një vit të ri plot sfida dhe tensione elektorale.
