Gjatë një takimi me strukturat elektorale në Fier, Bardhi shprehu shqetësimin për 12 vitet që, sipas tij, Shqipëria i ka humbur nën keqeverisjen dhe korrupsionin e kryeministrit Rama.
Ai theksoi se është koha për një ndryshim të thellë dhe për një të ardhme më të mirë për të gjithë shqiptarët, duke u bërë thirrje të gjithëve që të punojnë së bashku për të sjellë këtë ndryshim në qarkun e Fierit dhe në mbarë vendin.
Bardhi iu drejtua elektoratit demokrat me një mesazh shprese, duke theksuar se ky është një moment kyç për të gjithë qytetarët që e duan Shqipërinë më të ndershme dhe më të drejtë. Duke u ndalur tek rëndësia e madhe e protestës së ardhshme, ai i ftoi të gjithë të marrin pjesë masivisht në protestën e 29 Tetorit, duke e konsideruar atë si një shprehje të fortë të vullnetit qytetar.
Protesta një mesazh i qartë për Ramën
Ai shtoi se kjo protestë është më shumë se një ngjarje politike – është një mesazh i qartë që qytetarët e ndershëm i japin qeverisë për të mos lejuar Shqipërinë të rrëshqasë drejt autoritarizmit. Për Bardhin, ky është një apel për të ndalur krijimin e një shteti personal të Edi Ramës dhe për të ruajtur demokracinë në vend.
Në këtë takim me Shtabin Drejtues Politik të qarkut Fier, Bardhi dhe drejtuesit opozitarë diskutuan edhe organizimin elektoral të partisë dhe hapat e mëtejshëm të aksionit politik të opozitës. Protesta e 29 Tetorit do të mbahet në rrethrrotullimin e Levanit në Fier, si dhe në rrethrrotullimin e Rrogozhinës për Lushnjen dhe Divjakën, duke u bërë thirrje qytetarëve të këtyre zonave të bashkohen me kauzën.
Bardhi e përmbylli fjalën duke vënë theksin tek zhgënjimi që qarku i Fierit ka përjetuar, duke mos marrë kurrë mbrapsht besimin që i ka dhënë ndër vite partisë në pushtet. Sipas tij, qytetarët e këtij qarku e meritojnë një të ardhme më të mirë dhe një përfaqësim të drejtë.
Pjesëmarrja në protestën e 29 Tetorit, sipas Bardhit, është më shumë se një akt politik; është një mesazh që tregon vendosmërinë e qytetarëve për të mos pranuar më një shtet autoritar. Ky është momenti, thotë ai, që shqiptarët të ngrihen për një të ardhme më të mirë, më të ndershme dhe më të drejtë.
