Taulant Balla i përgjigjet me ironi akuzave të Sali Berishës, duke e krahasuar fjalën e tij në Kuvend me “djallin që interpreton Biblën”, ndërsa i kujton edhe përplasjet e dikurshme me Ina Ramën.
Kreu i Grupit Parlamentar të Partisë Socialiste, Taulant Balla, është përplasur sot në Kuvend me Sali Berishën pas deklaratave të këtij të fundit ndaj institucioneve të drejtësisë që po raportojnë përpara deputetëve. Në reagimin e tij, Balla përdori një metaforë të fortë, duke e krahasuar fjalimin e Berishës me një “predikim biblik nga djalli vetë”.
“Fjalimi i tij më kujtoi sikur djalli të interpretonte Biblën,” tha Balla me ironi, duke shtuar se kjo situatë nuk është asgjë e re për Kuvendin, ku shpesh debatet e opozitës kanë degraduar në akuza personale.
Në vijim, ai iu drejtua deputetëve të rinj të Partisë Demokratike, duke u kujtuar rregullat e brendshme të funksionimit parlamentar. “Keni tre libra përpara jush, Kushtetutën, Rregulloren dhe librin e traditës parlamentare që e kemi përgatitur katër vite më parë. Këta janë themeli i punës suaj,” deklaroi Balla.
Kreu i grupit socialist sqaroi se çdo pyetje që i drejtohet kryeministrit apo institucioneve duhet depozituar paraprakisht, në mënyrë që debati të zhvillohet mbi bazën e procedurës, jo të improvizimeve politike. “Kemi 12 orë e gjysmë debat për pesë institucione. Ju lutem, brenda jush zgjidhni hallin që ju ka kapur,” shtoi ai, duke iu referuar përçarjeve të brendshme të opozitës.
Në një moment të debatit, Balla kujtoi sjelljen e Berishës ndaj ish-Prokurores së Përgjithshme Ina Rama, kur kjo raportonte në Kuvend. “E mban mend, Sali? Kur raportonte Ina Rama, ti dhe deputetët e tu e linim sallën. E mban mend edhe Jozefina. Kjo është historia juaj,” ironizoi ai.
Fjalët e Ballës u pritën me tension nga opozita, ndërsa një pjesë e deputetëve të PD-së tentuan ta ndërprisnin. Megjithatë, ai vazhdoi duke theksuar se raportimi i institucioneve të drejtësisë duhet të trajtohet me seriozitet, jo me retorikë politike.
Balla përmbylli fjalën e tij duke i bërë thirrje opozitës që të marrë pjesë aktive në debatin institucional dhe të mos shmangë përgjegjësinë parlamentare. “Ne jemi këtu për të dëgjuar drejtësinë, jo për ta përdorur atë si armë politike,” theksoi ai.
Sot në Kuvend po zhvillohet seanca ku institucionet e drejtësisë, përfshirë Prokurorinë e Përgjithshme dhe SPAK-un, raportojnë përpara deputetëve. Berisha dhe disa përfaqësues të PD-së kanë paralajmëruar pyetje të drejtpërdrejta për drejtuesit e këtyre institucioneve, ndërsa PS ka kundërshtuar formatin e propozuar nga opozita.
Debati i sotëm pritet të jetë një ndër më të ashpërit e sesionit parlamentar, me përballje të drejtpërdrejtë mes Berishës dhe kreut të SPAK-ut, Altin Dumani.
