Futbolli ka një realitet ku çdo lojtar ka një çmim, por ka edhe ato raste kur, pavarësisht ofertave të mëdha financiare, disa futbollistë qëndrojnë besnikë ndaj klubit të tyre. Arabia Saudite ka shfaqur gjithmonë interes për t’i tërhequr yjet e futbollit europian, dhe Interi, në këtë rast, është një objektiv i preferuar. Pas disa tentativave, Al Hilal është rikthyer sërish pas mesfushorit të Inter, Nicolo Barella, duke ofruar një kontratë marramendëse.
Pak kohë më parë, klubi saudit i bëri një ofertë të parë Barellës prej 18 milionë euro në vit, por mesfushori italian e refuzoi me qetësi, duke theksuar se dëshira e tij ishte të qëndronte te Interi dhe të rinovonte kontratën me klubin zikaltër. Megjithatë, Al Hilal nuk e ka dorëzuar ende betejën dhe tani ka rritur ofertën, duke ofruar një shumë marramendëse.
Sipas të përditshmes italiane La Gazzetta dello Sport, klubi saudit ka bërë një tjetër hap dhe ka dërguar një ofertë të re dhe shumë më të joshshme: 35 milionë euro në vit për një kontratë 4-vjeçare. Kjo ofertë arrin në totalin prej 140 milionë euro për katër vitet e ardhshme, një shumë që mund të tundonte shumicën e lojtarëve të klasit botëror.
Megjithatë, Barella ka refuzuar përsëri këtë ofertë, duke qëndruar besnik ndaj Interit dhe ambicieve të tij. Ai ka rinovuar kontratën me klubin milanez vetëm një vit më parë, duke firmosur një marrëveshje deri në vitin 2029, që i siguron atij 6.5 milionë euro në sezon. Mesfushori duket se ndihet i lumtur në Milano dhe është në qendër të projektit të Interit, me synim të qartë fitimin e trofeve.
Barella ka bërë të ditur se është i kënaqur me statusin e tij te Interi dhe se nuk ka asnjë plan për t’u larguar. Për më tepër, ai e ka theksuar se objektivi i tij është që të mbetet te Inter dhe të kontribuojë në arritjen e qëllimeve të klubit, përfshirë fitimin e titujve të rëndësishëm.
Nëse Barella do të pranojë ofertën e Al Hilal, ai do të bëhej futbollisti italian më i paguar në histori, duke thyer rekordet e mbajtura deri tani nga Graziano Pelle, i cili fitonte 15 milionë euro në vit gjatë periudhës së tij në Kinë. Por për momentin, mesfushori zikaltër duket i palëkundur në besnikërinë e tij ndaj Interit.
